सप्तरी । धनुषा भलिबल टिम सप्तरीको छिन्नमस्ता गाउँपालिकामा आयाेजना गरिएकाे प्रथम राष्ट्रिय अध्यक्ष कप भलिबल प्रतियोगिताको उपाधी हात पारेको छ ।
प्रतियोगिताको शनिबार भएको फाइनल खेलमा उसले माेरंग टिमलाई ३-२ सेटले पराजित गर्दै उपाधी जितेको हो ।
पहिलो सेट्मा धनुषा २२ का विरुद्ध २५, दोस्रो सेटमा मोरङ २१ का विरुद्ध २५, तेस्रो सेटमा धनुषा २१ का विरुद्ध २५, चौथो सेटमा मोरङ २१ का विरुद्ध २५ तथा अन्तिम तथा पाचौं सेट्मा १४ का विरुद्ध १६ अंक जोडे ।
उपाधी जितेसँगै धनुषा टिमले नगद रू १ लाख नगदसहित ट्रफी हात पारेको छ । यस्तै दोस्रो भएको माेरंग टिम नगद रू ५१ हजार र ट्रफी प्राप्त गरेको छ ।
छिन्नमस्ता गाउँपालिकाका अध्यक्ष विद्यानन्द चौधरीको अध्यक्षतामा आयोजित कार्यक्रमका प्रमुख अतिथि नेपाल पत्रकार महासंघ, सप्तरीका अध्यक्ष श्रवणकुमार देवले विजेता तथा उप विजेता टाेलीलाई नगद पुरस्कार, कप तथा प्रमाणपत्र वितरण गरेका छन् ।
कार्यक्रमलाई सम्बोधन गर्दै प्रमुख अतिथि देवले युवालाई कुलतबाट बचाउन खेलकुदमा आकर्षित गर्नुपर्नेमा जोड दिए । उनले पछिल्लो समयमा विद्यालयले खेलकुद गराउन बन्द गर्दा बालबालिका पनि कुलतको बाटोमा फसिरहेको भन्दै जनप्रतिनिधिले यसतर्फ ध्यान दिनुपर्ने बताए ।
कार्यक्रममा छिन्नमस्ता गाउँपालिकाका प्रमुख प्रशासकीय अधिकृत ललन यादव, वडा नम्बर २ का अध्यक्ष सिकिन्दर साह, वडा नम्बर ३ का अध्यक्ष विजय यादव, वडा नम्बर ७ का अध्यक्ष अच्छेलाल यादव, छिन्नमस्ता मन्दिरका पिठाधिश महाकान्त ठाकुरसहितकाले मन्तव्य व्यक्त गरेका थिए ।
छिन्नमस्ता गाउँपालिकाले आयोजना गरेको प्रतियोगितामा देशभरिका १० जिल्लाको सहभागिता रहेको थियो ।
