२३ असोज, सप्तरी । जनता समाजवादी पार्टी (जसपा) का अध्यक्ष उपेन्द्र यादव र जनमत पार्टीका अध्यक्ष डा. सिके राउत एउटै क्षेत्रबाट चुनाव लड्ने पक्का भएको छ ।
यी दुबै अध्यक्ष सप्तरी क्षेत्र नम्बर २ बाट आज उम्मेदबारी दर्ता गराउँदैछन् । जनमत पार्टीका अध्यक्ष डा. राउतले आफू क्षेत्र नम्बर २ मै उम्मेदबारी दिने बताए ।
डा. राउत एक्लै चुनाव लड्दा जसपा अध्यक्ष यादव भने नेकपा एमालेसँग तालमेल गरेका छन् । ‘अध्यक्ष यादव क्षेत्र नम्बर २ बाटै उम्मेदबारी दिनुहुन्छ’ जसपा प्रबक्ता मनिष सुमनले भने ।
यादव सप्तरी २ बाट सप्तरी १ मा जाने चर्चा चलेपनि प्रबक्ता सुमनले २ बाटै लड्ने पक्का भएको बताए ।
जसपाका मधेश प्रदेशका मुख्य सचिव दिनेश यादवले पनि अध्यक्ष क्षेत्र नम्बर २ बाटै उम्मेदबारी दिने बताए । अध्यक्ष यादव दिउँसो ३ बजे आफैं उम्मेदबारी दर्ता गराउन जाने कार्यक्रम रहेको उनले बताए ।
क्षेत्र नम्बर २ मा सत्तारुढ गठबन्धनबाट लोकतान्त्रिक समाजवादी पार्टी (लोसपा) का नेता जयप्रकाश ठाकुरले उम्मेदबारी दिदैंछन् । ठाकुर २०७४ को निर्वाचनमा पनि स्वतन्त्र उम्मेदबारी दिएर १० हजारभन्दा बढी मत ल्याएका थिए ।
