राजविराज । नेपाल प्रेस युनियनले सरकारले सञ्चारमाध्यमलाई दिँदै आएको लोककल्याणकारी विज्ञापनवापतको रकम भुक्तानी सरल तथा सहज बनाउँदै विज्ञापनबापतको रकम वृद्धि गर्न माग गरेको छ ।
भक्तपुरमा मंगलबार सम्पन्न भएको युनियनको बैठकले उक्त माग गरेको हो । बैठकले स्वरोजगारमूलक सञ्चारमाध्यमको संरक्षण र सम्वद्र्धनका लागि सरकार तथा सम्बद्ध सरकारी निकायलाई विशेष आग्रह गर्ने र साना लगानीका स्वरोजगारमूलक सञ्चारमाध्यमको संरक्षण गर्ने नीति लिन, एफएम रेडियोहरूको नवीकरण राजस्वमा उल्लेख्य छुट दिन सरकारसँग माग गरेको महासचिव दिलिप पौडेलले जानकारी दिए ।
उनका अनुसार मुलुकमा देखिएको आर्थिक मन्दीका कारण साना लगानीका स्वरोजगारमूलक सञ्चारमाध्यम सञ्चालन गर्न कठिनाइ भइरहेको सन्दर्भमा सरकारी समाचार एजेन्सी राष्ट्रिय समाचार समितिले दिने समाचार सेवा निःशुल्क उपलब्ध गराउन पनि बैठकले आग्रह गरेको छ ।
केही सञ्चार प्रतिष्ठानले श्रमजीवी पत्रकारको पारिश्रमिक समयमा उपलब्ध नगराएको प्रति गम्भीर ध्यानाकर्षण भएको जनाउँदै बैठकले पत्रकारले पाउनुपर्ने पारिश्रमिक भुक्तानी गर्न, श्रमजीवी पत्रकार ऐन कार्यान्वयन गर्न, न्यूनतम पारिश्रमिक कार्यान्वयन गर्न तथा श्रमजीवी पत्रकारको सामाजिक सुरक्षाका लागि कल्याणकारी कोष निर्माण गर्न सञ्चार प्रतिष्ठानहरूसँग माग गरेको छ ।
प्रेस तथा अभिव्यक्ति स्वतन्त्रताको हक कुण्ठित हुने गरी विभिन्न तहका सरकारले निर्माण गरेका कानुन तथा निर्देशिकाहरूप्रति गम्भीर ध्यानाकर्षण भएको जनाउँदै प्रेस तथा अभिव्यक्ति स्वतन्त्रताको संविधानप्रदत्त अधिकार प्रतिकूल हुनेगरी कुनै पनि प्रकारका नीति, नियम, ऐन, कानुन, नियमावली नबनाउन जोडदार माग गरेको छ ।
‘नेपाल पत्रकार महासंघले सुरु गरेको सदस्यता शुद्धीकरण अभियानलाई नेपाल प्रेस युनियनले नजिकबाट नियालिरहेको र यसमा प्रेस युनियनको साथ छ’ बैठकपछि महासचिव पौडेलले जारी गरेको बिज्ञप्तीमा भनिएको छ, ‘तर, सदस्यता शुद्धीकरण प्रक्रिया अघि बढिरहँदा विचार र आस्थाका आधारमा सदस्यता नवीकरण हुन नदिने र सदस्य हुनबाट वञ्चित गर्ने कार्य भएमा नेपाल प्रेस युनियनले प्रतिवाद गर्नेछ ।’
युनियनले घोषणा गरेको ‘पत्रकार प्रशिक्षण वर्ष २०८०’ सफलतापूर्वक सम्पन्न गर्ने, पत्रकारिता तालिम सञ्चालन गर्नका लागि पाठ्यक्रम तयार गर्न नेपाल पत्रकार महासंघका पूर्व अध्यक्ष धर्मेन्द्र झाको संयोजकत्वमा पत्रकार प्रशिक्षण पाठ्यक्रम तयार समिति र नेपाल प्रेस युनियनका उपाध्यक्ष जीवन भण्डारीको संयोजकत्वमा प्रशिक्षकको सूची तयार गर्ने समिति गठन गर्ने निर्णय गरेको बैठकले अधिवेशन हुन बाँकी रहेका शाखा अधिवेशन असार ५ गतेसम्म सम्पन्न गर्ने निर्णय गरेको महासचिव पौडेलले बताए ।
