राजविराज । सप्तरीमा युवक र युवती झुण्डिएको अवस्थामा मृत भेटिएका छन् । उनीहरु जिल्लाको छुट्टाछुट्टै ठाउँमा मृत फेला परेको प्रहरीले जनाएको छ । एक युवतीको भने बिष खाएर ज्यान गएको छ ।
जिल्लाको बोदे बर्साइन नगरपालिका ८ बैरियाहीका एक युवक आँपको रुखमा झुण्डिएको अवस्थामा भेटिएका छन् । स्थानीय २० बर्षीय चित्ररंजन कुमार यादव सोही ठाउँका श्रीलाल यादवको बगैचामा आँपको रुखमा नाइलनको डोरीको पासो लगाएर झुण्डिएको अवस्थामा मृत फेला परेको प्रहरीले जनाएको छ ।
यस्तै, रुपनी गाउँपालिकामा एक युवती आफ्नै घरमा झुण्डिएको अवस्थामा मृत भेटिएकी छन् ।
गाउँपालिकाको वडा नम्बर ५ बस्ने रमेश दासकी २५ बर्षीया पत्नी बबी दास आफ्नै घरको सुत्ने कोठाको धरैनमा साडीको पासो लगाएर झुण्डिएको अवस्थामा मृत फेला परेको प्रहरीको भनाई छ ।
यस्तै, जिल्लाको अग्निसाइर कृष्णसवरण गाउँपालिका ५ छपकी बस्ने एक युवतीले बिष खाएर ज्यान गुमाएकी छन् ।
स्थानीय २२ बर्षीया प्रियंका कुमारी महतोले बिष खाँदा उनको मृत्यु भएको हो । नाम नखुलेको बिष खाएको पाइएपछि उनलाई उपचारका लागि राजविराज ल्याइएको र सोही क्रममा मृत्यु भएको प्रहरी प्रबक्ता एवं डीएसपी नरेश कुमार सिंहले जानकारी दिए ।
तीन वटै घट्नाबारे थप अनुसन्धान भइरहेको जिल्ला प्रहरी कार्यालय, राजविराजले जनाएको छ ।
