राजविराज । नेपाल पत्रकार महासंघ, सप्तरीले काठमाडौंकाे तिनकुनेमा एक पत्रकारको ज्यान जानेगरी भएको घट्नाकाे निष्पक्ष र स्वतन्त्र छानबिनका लागि राष्ट्रिय मानवअधिकार आयाेगसँग आग्रह गरेको छ ।
शुक्रबार आयाेगलाई इमेल मार्फत एक पत्र पठाउदै यस्तो आग्रह गरेको हो ।
गत चैत १५ गते काठमाडौंको तीनकुनेमा भएको हिंसात्मक घट्नामा प्रेस तथा अभिव्यक्ति स्वतन्त्रतामा हनन् हुने गरी सञ्चार गृह र सञ्चारकर्मीमाथि आक्रमण भएको र पत्रकार सुरेश रजकलाई आगोमा जलाएर हत्या गरिएको घट्नाका सन्दर्भमा नेपाल पत्रकार महासंघ सप्तरीले निष्पक्ष र स्वतन्त्र छानबिन गरी दोषिमाथि कारबाही, मृतक पत्रकारका परिवार तथा क्षति पुगेको सञ्चारगृहलाई क्षतिपूर्ति, घाइते पत्रकारको निःशुल्क उपचार, सञ्चार गृह र सञ्चारकर्मीको सुरक्षाको प्रत्याभूति तथा विगतदेखि नै प्रेस स्वतन्त्रता हनन्मा संलग्न रहेकाहरूलाई कानुनी कारबाहीको माग गर्दै नेपाल सरकारका माननीय गृहमन्त्रीसमक्ष यही चैत १८ गते ध्यानाकर्षण पत्र पेस गरेको पत्रमा अवगत गराइएको छ ।
‘यद्यपि सरकारले ती माग पूरा गर्नेतर्फ पहल नगरेकोले महासंघ आफ्ना माग पुरा गराउन आन्दोलित रहेको अवस्था छ’ अध्यक्ष श्रवण कुमार देवले पठाएको पत्रमा भनिएको छ, ‘यही सिलसिलाममा नेपाल पत्रकार महासंघ सप्तरी आयोगबाट माग पूरा गराउन सरकारको ध्यानाकर्षणका साथै घट्नाको निष्पक्ष र स्वतन्त्र छानबिन होस् भन्ने माननीय अध्यक्ष ज्यु समक्ष आग्रह गर्दछ ।’
