राजविराज । नेकपा एमालेका राष्ट्रिय उपाध्यक्ष रामबहादुर थापा ‘बादल’ ले संघीय लोकतान्त्रिक गणतन्त्र आएपनि चाहेजस्तो अवस्था परिवर्तन नभएको बताएका छन् ।
नेकपा एमाले सप्तरीको १० औं जिल्ला अधिवेशनलाई शनिवार राजविराजमा उद्घाटन गर्दै उनले संघीय शासन सत्ता हातमा लिएपनि अहिलेको स्थिति हामीले चाहेजस्तो नभएको बताए ।
देशमा गरिबी, असमानता, विभेद कायमै रहेको भन्दै उनले रोजगारी समेत नहुँदा युवा शक्तिलाई विदेशिनुपर्ने बाध्यता रहकेो बताए ।
नेपालमा रोजगारी गर्नेलाई परिवार पाल्न गाह्रो भइरहेको बताउँदै उनले समृद्ध नेपाल र सुखी नेपालीको आधार निर्माण गर्न समाजवादको स्थापना आवश्यक रहेको बताए ।
कुनै पनि दलले स्पष्ट बहुमत नपाएकै कारण चाहे जस्तो संविधान बन्न नसकेको, नियम कानुनहरु पनि बन्न नसकेको बताउँदै उनले जनताले लडेर ल्याएको संघीय लोकतान्त्रिक गणतन्त्रमा जनताले चाहे जस्तो काम हुन नसकेको बताए ।
नेकपा एमालेका जिल्ला अध्यक्ष ताराकान्त चौधरीको अध्यक्षतामा आयोजित उदघाटन सत्रमा जिल्ला इन्चार्ज सुमनराज प्याकुरेल, मधेश प्रदेशका भौतिक पुर्वाधार मन्त्री सरोज कुमार यादव, गृह, संचार तथा कानुन मन्त्री राजकुमार लेखी लगायतकाले मन्तव्य व्यक्त गरेका थिए ।
