राजविराज । मधेश प्रिमियर लिग (एमपिएल) काे तेस्रो संस्करणको तयारी पूरा भएको छ । मंगलबार भाेलीदेखि शुरू हुने प्रतियोगिताको अन्तिम तयारी सम्पन्न भएको आयोजकले सोमबार पत्रकार सम्मेलन गरी जनाएको छ ।
प्रतियोगिताको मधेश प्रदेशका मुख्यमन्त्री सतिश सिंहले बिहान ११ बजे राजविराजस्थित पविमावि खेल मैदानमा उद्घाटन गर्ने कार्यक्रम छ ।
प्रतियोगिताको उद्घाटन खेलमा छिन्नमस्ता रुपनी मधेश राइडर्स र कोशी दुहबी क्यापिटलले प्रतिस्पर्धा गर्नेछ ।
प्रतियोगितामा कुल ६ वटा टिमले प्रतिस्पर्धा गर्ने आयोजक मधेश प्रिमियर लिगका अध्यक्ष इन्जिनियर संजीनारायण यादवले जानकारी दिए ।
उद्घाटनका दिन एक खेल मात्रै हुने र ८ गतेसम्म दैनिक २ वटाका दरले खेल हुने आयोजकका उपाध्यक्ष तिर्थ दासले जानकारी दिए ।
१० गते सेमिफाइनलका दुबै खेल र ११ गते फाइनल हुने प्रतियोगिताका डाइरेक्टर पवन दासले जानकारी दिए । उनका अनुसार लिग चरणका १५, २ वटा सेमिफाइनल र एक फाइनल गरि कुल १८ खेल हुनेछ ।
प्रतियोगिताको उपाधी जित्ने टिमलाई रु ९ लाख १ हजार र उप विजेतालाई रु ४ लाखसहित शिल्ड प्रदान गरिने उनले बताए ।
प्रतियोगिताका सबै खेल पविमाविकै खेल मैदानमा हुनेछ ।
प्रतियोगितामा राष्ट्रिय क्रिकेट टिमका खेलाडी दिपेन्द्र सिंह ऐरी, कुशल भुर्तेल, आसिफ शेख, गुलसन झा, बसिर अहमद, नन्दन यादव, विवेक यादव, आरिफ शेख, ललित राजबन्सीसहितका खेलाडी विभिन्न टिममा आबद्ध छन् ।
