राजविराज । सबै सराेकारबाला इमान्दार भए मात्रै राजविराज नगरपालिकाको विकास हुनुपर्नेमा जोड दिइएको छ ।
अबको राजविराज योजनावद्व र दिगो विकास विषयमा संविधान सभा सदस्य रंजित कर्णले शुक्रबार आयोजना गरेको छलफल कार्यक्रममा बोल्दै बक्ताहरुले यस्तो बताएका हुन् ।
जनताको मत लिएर जितेका जनप्रतिनिधिले समेत चासो नदिदा राजविराजको विकास हुन नसकेको बक्ताहरुको भनाई थियो ।
मुलुककै पहिलो टाउन प्लानिङ शहर भएपनि जनप्रतिनिधि र सरोकारवाला गम्भीर बन्न नसक्दा नगरपालिका पछि पर्दै गएको बक्ताहरुको भनाई छ ।
कार्यक्रमका विज्ञ बक्ता शहरी विकास विज्ञ डा. किशोर कुमार झाले शिक्षा, स्वास्थ्य, कृषि, पर्यटन, सडक राम्रो भए राजविराजको चाँडाे विकास हुने बताए । उनले यसका निम्ति सबै इमान्दार बन्नुपर्ने बताए ।
प्रतिनिधि सभा सदस्य रन्जु ठाकुरले सबै एकजुट भए विकस सम्भव रहेको बताइन ।
उनले व्यक्तिगत स्वार्थ त्यागेर सबैलाई अघि बढ्न आग्रह गरिन ।
संविधान सभा सदस्य रन्जित कर्णले पदमा रहेकाहरुले कुनै काम गर्न नसक्दा राजविराज पछि पर्दै गएको बताए । ‘अरुले पनि जिम्मेवारी बहन नगर्दा समस्या देखिएको छ’ उनले भने ।
नेपाली कांग्रेसका जिल्ला सभापति रामदेव साहले भारतसँग यातायात जाेड्न सकिए राजविराजकाे चाँडो विकास हुन सक्ने बताए ।
कार्यक्रममा नेपाल उद्योग वाणिज्य महासंघका सदस्य अरूण प्रधान, नेपाल राष्ट्रिय मुक्ति पार्टीका अध्यक्ष दिपेन्द्र चौधरी, नेपाल पत्रकार महासंघ, सप्तरीका अध्यक्ष श्रवण कुमार देव, राजविराज नगरपालिकाका पूव मेयर शैलेश चाैधरी, नेपाली कांग्रेसका युवा नेता इर्साद अन्सारी, सामाजिक अभियन्ता ध्रुब देवसहितकाले मन्तव्य व्यक्त गरेका थिए ।
