राजविराज । नेकपा एमालेका नेताहरूले सप्तरी इन्चार्ज एवं पोलिट्ब्युरो सदस्य सुमनराज प्याकुरेललाई कार्वाहीको माग गरेका छन् ।
एमालेको सप्तरी अधिवेशनको पुर्व सन्ध्यामा पार्टीका केन्द्रीय सदस्यसहितका नेताहरुले प्याकुरेललाई कार्वाहीको माग गरेका हुन् ।
प्याकुरेललाई कार्वाहीको माग गर्दै पार्टी अध्यक्ष केपी शर्मा ओलीलाई निवेदन पठाइएको छ ।
शुक्रबार नेपाल पत्रकार महासंघ, सप्तरीमा पत्रकार सम्मेलन गर्दै पार्टीका केन्द्रीय सदस्य दिवाकर देवकोटा, सचिवालय सदस्य एवं पुर्व मन्त्री सत्यनारायण मण्डल, प्रदेश कमिटी सदस्य पन्चदेव खङ्सहितकाले प्याकुरेललाई कार्वाही गर्न निवेदन पठाइएको जानकारी दिएका छन् ।
उनीहरूले जिल्ला इन्चार्ज प्याकुरेल पार्टीमा हैकमवादी एकलौटी प्रवृत्ति कायम राख्दै अराजक गतिविधि गरिरहेको आरोप लगाएका छन् ।
‘प्याकुरेलले दास र मालीकको व्यवहार गरेको, कम्युनिष्ट आचरण र शैली समाप्त पारेको, निज जमीन्दारी र सामन्ती चरित्रको व्यक्ति भएको प्रमाणित भएको छ’ पठाइएको निवेदनमा भनिएको छ, ‘योग्य, सक्षम, ईमानदार र पूरानो कार्यकर्तालाई जालझेल र षडयन्त्र गरि जिम्मेवारीबाट बंचित गर्दै आएको छ । म भनेको एमाले, एमाले भनेको म, अहं, घमण्डी, वैमनस्य प्रवृति निजमा व्याप्त छ । सादा जीवन र उच्च विचारबाट विचलित भई सकेको देखिन्छ । हेला र अपमान गर्ने निजको आम प्रवृति हो। निज जिम्मेवारीमा आए देखि नै सप्तरी जिल्लाको संगठन ओरालो लागेको देखिन्छ ।’
निवेदनमा जिल्ला अधिवेशनलाई स्थगन गरी प्याकुरेलको चाल चलन आचरण शैली अनुसंधान गरी आवश्यक कार्यवाहीको लागि जोडदार अपील गरिएको छ ।
यी र यस्ता विभिन्न समस्याको समाधान नगरिए आफुहरूलाई जिम्मेवारीबाट मुक्त गरि दिन हुन नेतृत्व तह संग उनीहरूले माग गरेका छन् । माग पूरा नभए अगामी दिनमा पार्टी जिवनमा सबै भन्दा अप्रिय र कठोर कदम चाल्न बाध्य हुने उनीहरूले चेतावनी दिएका छन् ।
प्याकुरेलले बैठकहरूमा उपस्थितिको लागि जानकारी नगराउने, बैठकको कोरम नपुग्ने तैपनि निर्णय भएको छ भनेर जबरदस्ती निर्णय भएको थोपर्ने र प्रतिनिधि छनौटमा पनि विभिन्न खाले धाँधली गरेकाे उनीहरूकाे भनाई छ ।
