राजविराज । विश्व प्रेस स्वतन्त्रता दिवसको अवसरमा नेपाल पत्रकार महासंघ, सप्तरीद्वारा ‘पत्रकार आचारसंहिता र प्रेस स्वतन्त्रता’ बिषयक अन्तरकृया कार्यक्रमको आयोजना गरिएको छ ।
कार्यक्रमका बक्ताहरुले प्रेस अहिलेसम्म पनि स्वतन्त्र हुन नसकेको बताए । पछिल्लो समयमा राज्यबाटै प्रेस स्वतन्त्रतामा अंकुश लगाउने प्रयास भएको भन्दै बक्ताहरुले चिन्ता व्यक्त गरे ।
बक्ताहरुले पत्रकारहरुले समाचार लेख्दा आचारसंहिताको ख्याल गर्नुपर्ने समेत बताए । कतिपयले समाचार लेख्दा आचारसंहिताको पालना गरिरहेको नदेखिएको बक्ताहरुले बताए ।
जिल्ला समन्वय समितिका प्रमुख शिवनारायण साहले सरकारले काठमाडौंको तिनकुने घट्नामा मारिएका पत्रकारको छानबिन गर्न नचाहेको बताए । ‘यो घट्नाको छानबिन समिति बनाएर अनुसन्धान गर्नुपर्छ’ उनले भने ।
राज्यले पत्रकारमाथि हुने घटनाका दोषीलाई कार्वाहीको दायरामा ल्याउनुपर्नेमा जोड् दिदैं उनले पत्रकारले पनि सहि सत्यको आधारमा पत्रकारिता गर्नुपर्ने बताए ।
प्रमुख जिल्ला अधिकारी भोला दाहालले संविधानको प्रस्तावनामै प्रेस स्वतन्त्रताबारे उल्लेख गरिएको बताए ।
सप्तरीका पत्रकारले निष्पक्ष पत्रकारिता गरेकोमा धन्यवाद दिदैं उनले यहाँका पत्रकारद्वारा लेखिएको समाचारले सरोकारवालालाई घच्घच्याइरहेको बताए ।
प्रेस स्वतन्त्रता रहनुपर्नेमा जोड् दिदैं उनले पत्रकारले पनि आचारसंहिता पालना गरेर पत्रकारिता गर्नुपर्ने बताए । ‘अपुष्ट, गलत र भ्रामक समाचार नलेखी सत्य तथ्य समाचार लेख्नुपर्छ’ उनले भने ।
नेपाल पत्रकार महासंघका केन्द्रीय सदस्य राजु विश्वकर्माले राज्यले प्रेस स्वतन्त्रता हनन गर्न खोजेको आरोप लगाए । उनले सरकारले बिभिन्न विधेयक ल्याएर प्रेसलाई घेरामा पार्न खोजेको बताए ।
‘यदी यस्तो हुन्छ भने पत्रकार महासंघ चुप लागेर बस्दैन’ उनले भने, ‘हामी आन्दोलनमा उत्रन्छौं ।’
कार्यक्रममा नेपाल पत्रकार महासंघ, सप्तरीका पूर्व अध्यक्षहरु बिष्णु कुमार मण्डल, बैद्यनाथ झा, मुरली प्रसाद यादव र धिरेन्द्र साह, महासंघका पूर्व मधेश प्रदेश समिति सचिव भोला पासवान, नेपाल प्रेस युनियनका जिल्ला अध्यक्ष बिनय कुमार लाल कर्ण, प्रेस चौतारीका जिल्ला उपाध्यक्ष नानीमैयाँ कटुवाल, प्रेस मंचका अध्यक्ष धर्मपाल राउत, प्रेस सेन्टरका अध्यक्ष बिन्दु कुमार यादवसहितकाले मन्तव्य व्यक्त गरेका थिए ।
नेपाल पत्रकार महासंघ, सप्तरीका अध्यक्ष श्रवणकुमार देवको अध्यक्षतामा भएको कार्यक्रममा उपाध्यक्ष रामनारायण विश्वासले स्वागत मन्तव्य व्यक्त गरेका थिए भने संचालन सह सचिव डम्बर राईले गरेका थिए ।
