राजविराज । उच्च अदालत जनकपुर राजविराज इजलासले अनुमति पाएको भन्दा माथिल्लो कक्षामा विद्यार्थी भर्ना नगर्न अन्तरिम आदेश दिएको छ ।
सप्तरीको हनुमाननगर कंकालिनी नगरपालिका निवासी प्याव्सन, सप्तरीका पूर्व अध्यक्ष समेत रहेका अरुण कुमार देवले दायर गरेको निषेधाज्ञा रिटमा अदालतले यस्तो आदेश दिएको हो ।
देवले हनुमाननगर कंकालिनी नगरपालिका, शिक्षा विकास तथा समन्वय इकाईसहितकाबिरुद्ध रिट दायर गरेका थिए । न्यायाधीश कृष्ण प्रसाद सुवेदीको गत १२ बैशाखको इजलासले विद्यालय कक्षा संचालन गर्न अनुमति पाएको भन्दा माथिल्लो कक्षामा विद्यार्थी भर्ना नलिन, कक्षा संचालन नगर्न, नगराउन अल्पकालिन अन्तरिम आदेश दिएको थियो ।
उक्त इजलासले अन्तरिम आदेश जारी हुने नहुने सम्बन्धमा दुबै पक्ष राखी छलफल गराउनका निम्ति १९ गतेको समय तोकिएको थियो ।
१९ गते छलफल भएपछि अदालतले अनुमति पाएको भन्दा माथिल्लो कक्षामा विद्यार्थी भर्ना नलिन, कक्षा संचालन नगर्न, नगराउन अन्तरिम आदेश नै दिएको छ ।
न्यायाधीशद्वय अर्जुन प्रसाद अधिकारी र पूर्ण प्रसाद राजबंशीको संयुक्त इजलाशले अन्तरिम आदेशलाई निरन्तरता दिएको हो ।
यो आदेशपछि अब अनुमति पाएको भन्दा माथिल्लो कक्षामा विद्यार्थी भर्ना गर्ने बाटो बन्द भएको छ ।
