राजविराज । सप्तरीमा भएको सबारी दुर्घटनामा एक व्यक्तिको मृत्यु भएको छ भने एक दम्पति घाइते भएका छन् ।
जिल्लाको शम्भुनाथ नगरपालिका ८ पोखरियास्थित भित्री सडक खण्डमा पोखरियाबाट देवघाटतर्फ जाँदै गरेको प्रदेश २–०१–००१ स १०२५ नम्बरको टेम्पु रिक्सा र बिपरित दिशाबाट आउँदै गरेको मधेश प्रदेश ०१–००५ प ५७३३ नम्बरको मोटरसाइकल एक आपसमा ठोक्किर दुर्घटना भएको प्रहरीले जनाएको छ ।
दुर्घटनामा तत्काल नामथर वतन खुल्न नसकेको मोटरसाइकल चालक अन्दाजी २५ बर्षका पुरुषको मृत्यु भएको प्रहरीले जनाएको छ ।
गम्भीर घाइते भएका उनलाई उपचारको लागि गजेन्द्र नारायण सिंह अस्पताल राजबिराज ल्याएको केहि बेरमा इसिजी गर्दा चिकित्सकले मृत घोषणा गरेको सप्तरी प्रहरीका प्रबक्ता एवं डीएसपी जितेन्द्र कुमार बस्नेतले जानकारी दिए ।
सोही दुर्घटनामा टेम्पु चालक शम्भुनाथ नगरपालिका ८ पोखरिया बस्ने ४५ बर्षीय मणिलाल मण्डल र उनकी ४० बर्षिया पत्नी आशा देवी मण्डल घाइते भएकी छन् । उनीहरुको कल्याणपुरमा उपचार भइरहेको प्रहरीले जनाएको छ ।
