राजविराज । प्रहरीको गोली लागेर राजगढ गाउँपालिका २ का लालु यादवको मृत्यु भएको घट्नाप्रति भर्त्सना गर्ने क्रम जारी रहेको छ ।
पछिल्लो पटक प्रतिनिधी सभा सदस्य, प्रदेश सभा सदस्य समेतले यो घट्नाको भर्त्सना गरेका छन् ।
सप्तरी क्षेत्र नम्बर ३ बाट निर्वाचित प्रतिनिधी सभा सदस्य दिनेश कुमार यादव, प्रदेश सभा सदस्य मोहम्द समीमले घट्नाको भर्त्सना गरेका छन् ।
दुबैले छुट्टाछुट्टै विज्ञप्ती जारी गर्दै अवैध मदिरा ओसारपसारको नाममा प्रहरीले गोली हानी एक होनहार युवाको ज्यान लिएको बताएका छन् ।
घट्नाको उच्चस्तरीय छानबिन समिति बनाई घट्नामा संलग्नलाई कार्वाही गर्न माग विज्ञप्तीमा माग गरिएको छ ।
यस्तै, नेपाली कांग्रेस क्षेत्र नम्बर ३ का सभापति भूपेन्द्रनारायण यादवले समेत विज्ञप्ती मार्फत् घट्नाको भर्त्सना गरेका छन् । उनले पनि दोषीमाथि कार्वाहीको माग गरेका छन् ।
गत मंगलबार राति प्रहरीको टोलीले राजगढ गाउँपालिकामा चलाएको गोली लागेर यादवको मृत्यु भएको थियो ।
