राजविराज । राजविराज–सखडा–गोबिन्दपुर सडक अबिलम्ब निर्माणको माग गर्दै सोमबार पदयात्रा गरिएको छ ।
सखडादेखि बिसनपुर चोकसम्म नागरिक अगुवाहरुले पदयात्रा गरेका हुन् । पूर्व सिंचाई मन्त्री उमेश कुमार यादवको अगुवाईमा राजविराजदेखि सखडा हुँदै गोविन्दपुरसम्मको सडकको अबिलम्ब निर्माणको माग गर्दै सोमबार पदयात्रा गरिएको हो ।
पदयात्राका क्रममा उनीहरुले ‘राजविराज–सखडा–गोविन्दपुर सडक तत्काल निर्माण गर, सुशासन कायम गर, खोई सरकार, खोई ठेकेदार ?’ जस्ता नारा लगाएका थिए ।
यो सडकको ठेक्का लागेको लामो समय भइसकेको छ । साह निर्माण सेवाले ठेक्का लिएपनि सडक निर्माण हुन सकेको छैन् । राजविराजदेखि सखडासम्म दैनिक रुपमा सयौं श्रद्धालु छिन्नमस्ताको दर्शन तथा पूजापाठका लागि जाने गर्छन् ।
दशैं आउन लाग्दा समेत सडक निर्माणतर्फ कुनै चासो नदेखाउँदा आफूहरु दवाव स्वरुप पदयात्रा गरेको पूर्व मन्त्री यादवले बताए ।
पूर्वमन्त्री यादवले शान्तिपूर्ण आन्दोलनबाट सुनुवाइ नभए थप कडा आन्दोलनमा उत्रिने चेतावनी दिए ।
दशैंमा छिनन्मस्तामा पूजापाठ र दर्शनका लागि हजारौं श्रद्धालु आउने गर्दछन् । तर सडक राम्रो नहुँदा सास्ती खेप्नुपर्ने हुन्छ ।
