राजविराज । सप्तरी सदरमुकाम राजविराजमा एक जना पत्रकारको साइकल चोरी भएको छ ।
स्थानीय गजेन्द्र चोकबाट शुक्रबार राति ७ बजेतिर प्रेस स्वतन्त्रता सेनानी समेत रहेका पत्रकार बैद्यनाथ झाको साइकल चोरी भएको हो । साइकल पार्किङ्ग गरेर केहि व्यक्तिसँग कुरा गरिरहँदा उनको आँखै अगाडि साइकल चोरी भएको हो ।
‘केहि व्यक्तिसँग कुरा गरिरहँदाा एक्कासी आएका चोरले साइकल लिएर भागे’ नेपाल पत्रकार महासंघ, सप्तरीका पूर्व अध्यक्ष समेत रहेका झाले भने, ‘हल्ला गरेर दौड्दा समेत चोर साइकल लिएर भागे ।’
साइकलमा छापिएको पत्रिका राखिएको थियो । चोरले पत्रिका समेत साइकल लिएर भागेका थिए ।
तत्कालै यस बिषयमा सप्तरी प्रहरीका प्रबक्ता एवं डीएसपी जितेन्द्र कुमार बस्नेतलाई जानकारी गराइयो । बस्नेतले प्रहरीमा चोरीको सूचना सर्कुलर गरेको करिब आधा घण्टाभित्रै साइकल फेला पर्यो । पत्रिका लोड गरिएको साइकल हेरेपछि प्रहरीले जनआन्दोलन चोकमा पक्रिन खोज्दा चोर साइकल छाडेर भाग्न सफल भएको डीएसपी बस्नेतले बताए ।
चोरिएको साइकल सम्बन्धित व्यक्तिलाई फिर्ता गरिएको डीएसपी बस्नेतको भनाई छ ।
