देव जातीहरुको अन्तर्राष्ट्रिय महासम्मेलनको तयारी अन्तिम चरणमा पुगेको छ । आगामी असोज १७, १८ र १९ गते राजविराजमा महासम्मेलनको आयोजना गरिदैंछ ।
देव जातीका बिभिन्न ५ वटा संस्थाले संयुक्त रुपमा आयोजना गर्न लागेको महासम्मेलनमा नेपालको मेचीदेखि महाकालीसम्म छरिएर रहेका सम्पूर्ण देव जाती तथा भारतको बिभिन्न ठाउँमा रहेका देव जातीको सहभागिता रहनेछ ।
आयोजकले आज राजविराजस्थित वागेश्वरी सेवा समितिको कार्यालयमा पत्रकार सम्मेलन गरी महासम्मेलनबारे जानकारी गराएको छ । महासम्मेलन तयारी समितिका संयोजक इन्जिनियर इन्द्रनारायण देवले नेपालमा अत्यन्तै अल्पसंख्यक रहेको देव जातीप्रति राज्यले अहिलेसम्म कुनै चासो नदिएको बताए ।
देव जाती आफ्नै बलबुतामा राज्यका संयन्त्रमा पुग्ने गरेपनि उत्थानका निम्ति राज्यको तर्फबाट कुनै पहल हुन नसकेको बताए ।
उनले देव जातीको पहिचान एवं सर्वमान्य इतिहास निर्माण गर्न, जातीय संस्थाहरुबीच समन्वय, समझदारी, सदभाव, परस्पर सहयोग एवं सम्पूर्ण स्वजातीबीच एकताबद्ध गराउने उद्देश्यले महासम्मेलन गर्न लागिएको बताए ।
देवजातीको संस्कृति, एवं संस्कारको संरक्षणका क्रममा स्वजातीबीच बढिरहेको छोडपत्र, बहुविवाह, अन्तरजातीय विवाह, समगोत्री विवाह एवं दाइजो प्रथा न्यूनिकरणका प्रयासहरु महासम्मेलनबाट खोजिने उनले बताए ।
पत्रकार सम्मेलनमा तयारी समितिका सह संयोजक राजेन्द्र देवले महासम्मेलन मार्फत् स्वजातीबीच रहेको संस्कारगत क्रियाकलापमा समय साक्षेप परिमार्जन संशोधन गरिने बताए ।
उनले दिनमा विवाह गर्ने प्रावधान लागू गर्ने उद्देश्य समेत रहेको बताए । श्राद्ध कर्ममा दुई दिन श्राद्ध एवं सम्पीडन दिन मात्रै भोजको बारेमा छलफल गर्दै महासम्मेलनले अति अल्पसंख्यक देव जातीको लागि सरकारसँग आरक्षणको व्यवस्था समेत मिलाउन माग गर्ने तयारी गरेको छ ।
राजविराजस्थित वागेश्वरी सेवा समिति र भावनी सेवा समिति, विराटनगरस्थित विराट देव सेवा समिति र झापाको बिर्तामोडस्थित देव समाजले संयुक्त रुपमा महासम्मेलनको आयोजना गर्दैछ ।
महासम्मेलनले एउटा छाता संगठन निर्माण गर्ने र सबै संस्थाहरु यसको सदस्य रहने संयोजक इन्जिनियर देवले बताए ।
पत्रकार सम्मेलनमा तयारी समितिका अर्का सह संयोजक इन्द्रकुमार देवले स्वागत मन्तव्य व्यक्त गर्दै महासम्मेलन सफल बनाउन सबैसँग आग्रह गरे ।
