राजविराज । दशैंमा शक्तिपीठहरु जाँदा जुत्ता, चप्पल कहाँ राख्ने ? चिन्ता प्रायः सबैलाई हुन्छ । किनभने भींड नै अत्यधिक हुन्छ । भींडकै मौका छोपेर कतिपयको जुत्ता, चप्पल हराउने पनि गर्दछ ।
यहीं अवस्थालाई मध्यनजर गर्दै सप्तरीमै पहिलो पटक श्रद्धालुको जुत्ता, चप्पल व्यवस्थापन गर्ने कार्य प्रारम्भ भएको छ । दशैंमा धेरै भींड हुने छिन्नमस्ता मन्दिरमा यो कार्य सोमबारदेखि शुरु गरिएको छ ।
विश्व हिन्दु परिषद् नेपाल सेवा विभाग सप्तरीद्वारा मन्दिर प्राङ्गणमा जुत्ता, चप्पल व्यवस्थापन शुरु गरिएको छ । यो मन्दिरमा फुलपातीको दिन अत्यधिक भींड रहने गर्दछ ।
एक हजार झोला खरीद गरेर श्रद्धालुको जुत्ता, चप्पल निःशुल्क व्यवस्थापन गरिरहेको परिषद्का मधेश प्रदेश संगठनका सचिव जंगबहादुर सिंहले बताए । झोलाहरुमा उल्लेख भएको कुपन नम्बर जुत्ता, चप्पल राख्ने श्रद्धालुलाई दिने गरेका छौं’ उनले भने, ‘ पूजापाठ गरी फर्किदा कुपन दिएपछि हामी फिर्ता गर्ने गरेका छौं ।’
यो कार्यमा १५ जना स्वयंसेवक र परिषद्का पदाधिकारी गरी २५ जना खटिएका छन् । स्वयंसेवक र पदाधिकारी पनि सेवाभावले निःशुल्क काम गरिरहेको सिंहले बताए ।
जुत्ता, चप्पल व्यवस्थापन गर्ने कार्यको छिन्नमस्ता गाउँपालिकाका अध्यक्ष विद्यानन्द चौधरीले उद्घाटन गरेका छन् ।
परिषद्लाई व्यानर, टेन्टहरु भने छिन्नमस्ता गाउँपालिकाले उपलब्ध गराएको छ ।
संगठन विभाग सचिव सिंहले यो कार्य विजयादशमीको दिनसम्म संचालनमा रहने बताए । आगामी बर्षदेखि दशैंको शुरुवातमै यो कार्य संचालन गर्ने परिषद्ले जनाएको छ ।
