राजविराज । श्रमिकहरुको न्यूनतम पारिश्रमिक उपलब्ध गराउनेतर्फ सरोकारबालाहरु गम्भीर बन्नुपर्ने राजविराजमा आयोजित एक कार्यक्रमका बक्ताहरुले जोड् दिएका छन् ।
फ्रिडम फण्डको सहयोग, राजविराज नगरपालिकाको समन्वयमा श्रीपुर्राज सामुदायिक विकास केन्द्रले आयोजना गरेको ‘न्यूनतम पारिश्रमिक र मर्यादित श्रम अभ्यास’ सम्बन्धी अन्तरकृया कार्यक्रमका बक्ताहरुले यस्तो बताएका हुन् ।
मुक्त हरवा चरवा पुर्नस्थापना कार्यक्रम अन्तर्गत आयोजना गरिएको कार्यक्रममा उनीहरुले श्रमलाई मर्यादित बनाउँदै न्यूनतम पारिश्रमिक उपलब्ध गराउनुपर्ने बताए । कामदारलाई अहिले दैनिक रु ७५४ उपलब्ध हुँदै आएको बताउँदै बक्ताहरुले यसतर्फ पुर्नविचार गर्नुपर्ने बताए ।
उनीहरुले काम अनुसारको पारिश्रमिक उपलब्ध गराउनुपर्नेमा जोड् दिदैं पालिकाहरु यसतर्फ गम्भीर बन्नुपर्ने बताए । उनीहरुले तोकिएको पारिश्रमिक उपलब्ध भए/नभएको सम्बन्धमा अनुगमन समेत गरिनुपर्नेमा जोड् दिए ।
कार्यक्रमका प्रमुख अतिथी राजविराज नगरपालिका कावा प्रमुख इसरत परबिनले काम गर्ने मजदूरहरुको पारिश्रमिक तोक्न नगरपालिकाले कार्यविधी ल्याउने बताइन् । उनले सरोकारबालाहरुसँग छलफल गरी कार्यविधी ल्याइने बताइन् ।
उनले कामदारहरुको पारिश्रमिक उपलब्ध भए/नभएको सम्बन्धमा अनुगमन समेत गरिने बताइन् ।
कार्यक्रममा नगरपालिकाका निमित्त प्रमुख प्रशासकीय अधिकृत भोगेन्द्र यादवले श्रमिकहरुलाई उचित पारिश्रमिकसँगै उनीहरुको बालबालिकालाई शिक्षा दिलाउन सबै अग्रसर हुनुपर्ने बताए ।
कार्यक्रममा नेपाल पत्रकार महासंघ, सप्तरीका अध्यक्ष श्रवणकुमार देव, गैसस महासंघका उपाध्यक्ष बलदेव मण्डलसहितका सरोकारबालाले आ–आफ्ना धारणा राखेका थिए ।
कार्यक्रममा आयोजक संस्थाका मनोज गौतमले संस्थाको परिचयसहित कार्यक्रमबारे प्रस्तुतीकरण गरेका थिए ।
