परिष कर्ण
राजविराज । संयुक्त बजार अनुगमन समितिद्वारा आज राजविराज बजारस्थित बधशालाहरुको अनुगमन गरिएको छ । अनुगमनका क्रममा कुहिएको मासु समेत बरामद भएको छ । मासु पसलेले निर्धारितभन्दा बढी मूल्यमा बिक्री गरिरहेको पाइएको छ ।
राजविराज ३ स्थित एक वर्षदेखि संचालनमा रहेको मोहम्मद कादिर, मोहम्मद मस्तकिमको समेत ३ वटा दर्ता नरहेको मासु पसलबाट जिल्ला प्रशासनको संयुक्त अनुगमन टोलीले खान अयोग्य मासु कब्जा गरी सटरमा ताल्चा लगाएको छ ।
राजबिराजमा नाम चलेका तथा ठूलो परिमाणमा मासु सप्लाई गर्ने विजय फ्रेस हाउसमा मुल्य सूची नरहेको पाइएको छ । राजविराज नगरपालिकाको पशुपंक्षी विकास शाखाको विज्ञ पशु चिकित्सक सन्नी कुमार दासका अनुसार खान अयोग्य ६ किलो बासी मासु नष्ट गरिएको छ ।
त्यस्तै प्रति किलो एक हजार ५० निर्धारित मूल्य भन्दा बढी मूल्यमा मासु बेचेको समेत पाइएको उनले बताए ।
राजविराज नगरपालिका पशुपंक्षी विकास शाखाद्वारा संचालित हटिया स्थितको सावित्री खशी मासु पसलमा १० किलो बढी कुहिएको मासु भेटिएको छ । जसलाई नष्ट गरिएको छ ।
अनुगमनका क्रममा यमी स्वीट्समा ब्रेड बनाउन मुछिएर राखिएको २ किलो जति मैदा नष्ट गरिएको जिल्ला प्रशासन कार्यालयका प्रवक्ता सहायक प्रमुख जिल्ला अधिकारी नरेश कुमार यादवले जानकारी दिए ।
यसको अलाबा यमी स्वीट्सको भान्सा एवम् तयारी मिठाई, ब्रेड भण्डारण कक्षमा सरसफाईमा कमी, खाने कुरा बनाउने प्रशोधन कक्ष खुल्ला ठाउँमै राखिएको अवस्थामा रहेकोले त्यसलाई पूर्णरूपमा बन्द गरेर आगामी दिनमा सुरक्षित रुपमा खाने कुरा उत्पादन गर्न ’यम्मी ’ का सञ्चालकलाई निर्देशन दिइएको छ ।
भण्डारण कक्ष, प्रशोधन कक्ष तथा व्यक्तिगत सरसफाईमा सुधार गरी हप्ता दिन भित्र खाद्य प्रविधि तथा गुण नियन्त्रण कार्यालय को ऐन–२०८१ वमोजिममा उपस्थित हुने होटल तथा मासु पसल सञ्चालकहरुले प्रतिबद्धता जनाएको खाद्य तथा गुण नियन्त्रण कार्यालय राजविराजले जनाएको छ ।
