रास्वापा प्रवेशको एक सातापछि जसपमा प्रवेश

राजविराज । एक साताअघि मात्रै राष्ट्रिय स्वतन्त्र पार्टी (रास्वपा) प्रवेश गरेकाहरु जनता समाजवादी पार्टी (जसपा) नेपालमा प्रवेश गरेका छन् ।

सप्तरीको क्षेत्र नम्बर ३ अन्तर्गत विष्णुपुर गाउँपालिकाका अध्यक्ष पदका प्रत्यासी मुनिलाल खंगसहित एक दर्जन रास्वपाका नेताहरु शनिबार जसपा नेपालमा प्रवेश गरेका हुन् ।

तत्कालिन जमुनी मधेपुरा गाविसका अध्यक्ष समेत भएका खंगलाई जसपा नेपालका अध्यक्ष उपेन्द्र यादवले माला र टीका लगाएर पार्टीमा प्रवेश गराए ।

जमुनी मधेपुरामा आयोजित अगुवा कार्यकर्ता भेटघाटका क्रममा खंगसहितकाहरु जसपमा प्रवेश गरेका हुन् ।

खंग र उनका समर्थकहरु एक साताअघि मात्रै रास्वपामा प्रवेश गरेका थिए । त्यस बेला रास्वपा क्षेत्र नम्बर ३ का उम्मेदबार अमरकान्त चौधरीले पार्टी प्रवेश गराएका थिए ।