राजविराज ।
नेपाल लाइफ इन्स्योरेन्सका वरिष्ठ एजेन्सी म्यानेजर मोकेन्द्र यादवले बीमा क्षेत्रको विश्वकै प्रतिष्ठित संस्था ‘मिलियन डलर राउण्ड टेबल’ का लागि लगातार छैठौं पटक आफ्नो स्थान सुरक्षित गर्न सफल भएका छन्।
पोखराको होटल ग्राण्डीमा आयोजित एक विशेष समारोहका बीच यादवलाई यो ऐतिहासिक उपलब्धिको लागि सम्मान गरिएको छ। सन् २०२१ देखि निरन्तर एमडिआरटीमा छनोट हुँदै आएका यादवले यसअघि दुई पटक समेत क्वालिफाइड भई आफ्नो कार्यक्षमता प्रदर्शन गरिसकेका छन्।
सप्तरी जिल्लाको राजविराज नगरपालिका वडा नं. ५ मा जन्मिएका यादव एक सफल बीमा अभिकर्ताका साथै राजनीतिक क्षेत्रमा पनि उत्तिकै सक्रिय छन्। उनको अबको मुख्य लक्ष्य लगातार १० वर्षसम्म एमडिआरटी क्वालिफाइड भई यो ग्लोबल संस्थाको ‘आजीवन सदस्य‘ बन्ने रहेको छ।
लामो समयदेखि बीमा क्षेत्रमा आबद्ध यादवको यो निरन्तरको सफलतालाई उनको व्यावसायिक निष्ठा, कडा परिश्रम र बिमितप्रतिको समर्पणको प्रतिफलका रूपमा हेरिएको छ। सम्मान कार्यक्रममा बोल्दै उपस्थित व्यक्तित्वहरूले यादवको सफलताले नयाँ आउने अभिकर्ताहरूका लागि ठूलो प्रेरणा मिल्ने विश्वास व्यक्त गरे।
बीमा अभिकर्ताको रूपमा नेपाल लाइफ इन्स्योरेन्समा आबद्ध भई उनले बीमाको महत्वलाई गाउँ-गाउँसम्म पुर्याउन महत्त्वपूर्ण भूमिका निर्वाह गर्दै आएका छन्।
