मधेश सम्वाददाता
राजविराज, ३० फागुन ।
सप्तरी प्रहरीले भारतबाट भन्सार छलेर ल्याएको झण्डै साढे सात लाख रुपैयाँ बराबरको सामान बरामद गरेको छ ।
जिल्लाको छिन्नमस्ता गाउँपालिका वडा नम्बर ३ महुवा टोल बस्ने प्रमोद यादवको घरमा भन्सार छलेर ल्याइएको सामान फेला परेको छ । सोमबार राति पौने १२ बजेतिर जिल्ला प्रहरी कार्यालयबाट गएको टोलीले रु ७ लाख १ हजार मूल्य बराबरको सामान बरामद गरेको छ ।
यादवको घरबाट पोण्डस ४१ कार्टुन, खैनी ८ बोरा, सजल डेरी हाइटनर १ कार्टुन र प्रदेश २–०१–००२ प ४६६०, को३५प ९९४१ र स.९प २३४४ नम्बरको तीन वटा मोटरसाइकल समेत नियन्त्रणमा लिई आवश्यक कार्वाहीका लागि जिल्ला भन्सार कार्यालय, सप्तरीमा पठाइएको प्रहरीले जनाएको छ ।
यस्तै, हनुमाननगर कंकालिनी नगरपालिका वडा नम्बर ८ स्थित नहरबाट प्रहरीले ३१ जोर जुत्ता वेवारिसे अवस्थामा फेला पारेको छ ।
रु २१ हजार ७ सय बराबरको उक्त जुत्ता आवश्यक कार्वाहीका लागि जिल्ला भन्सार कार्यालयमा पठाइएको प्रहरीको भनाई छ ।
