राजविराज । रोड बनाउने जिम्मा लिएको निर्माण कम्पनीले समयमा काम नगरेकोप्रति सरोकारबालाले रोष प्रकट गरेका छन् ।
राजविराजसहित सप्तरी जिल्लामा सडक बनाउने जिम्मा लिएको निर्माण कम्पनीका प्रतिनिधीलाई बोलाएर सरोकारबालाले अबिलम्ब काम सकाउन निर्देशन दिएका छन् । समयमा काम नगरे कार्वाहीको प्रकृयामा अघि बढ्ने उनीहरुले चेतावनी दिए ।
बुधबार जिल्ला प्रशासन कार्यालयमा प्रतिनिधीसभा सदस्य दिनेश यादव, राजविराज नगरपालिकाका कार्यबाहक मेयर इसरत परबिन, प्रमुख जिल्ला अधिकारी भूपेन्द्र थापासहितकाले निर्माण कम्पनीका प्रतिनिधीलाई बोलाएर अबिलम्ब काम पूरा गर्न निर्देशन दिएका हुन् ।
कमला–कंचनपुर सडक खण्ड, राजविराजको रिंग रोड, बसपार्कसहित बिभिन्न रोड बनाउने जिम्मा पाएका निर्माण व्यवसायीलाई बोलाएर काम सुस्त गतिमा चलिरहेको भन्दै अबिलम्ब काम पूरा गर्न उनीहरुले निर्देशन दिए ।
प्रतिनिधीसभा सदस्य यादवले पटक–पटक म्याद थप गराएपनि काम पूरा गर्न नसकेको भन्दै दुःख व्यक्त गरे । ‘अब यसरी खेल्न पाइँदैन्’ उनले भने, ‘समयमा सडक बन्न नसक्दा धुवाँधुलोका कारण जनता बिरामी पर्न थालेका छन् ।’
जिल्लामा निर्माण व्यवसायीले ठेक्का लिएर काम नगरिरहेको सन्दर्भमा आफूले संसद मार्फत् सरकारको ध्यानाकर्षण गराएको बताउँदै उनले अब पनि समयमा काम नभए आफू त्यस्ता कम्पनीलाई कार्वाही गराउन अघि बढ्ने बताए ।
राजविराज नगरपालिकाका कार्यबाहक मेयर परबिनले समयमा काम नहुँदा जनता आफूहरु समक्ष आन्दोलन गर्न आउने गरेको बताइन् । उनले अब जिम्मा लिएको काम समयभित्र पूरा नगरे ठीक नहुने बताइन् ।
प्रमुख जिल्ला अधिकारी थापाले निर्माण कम्पनीले समयमा काम नगर्दा पनि सम्बन्धित सरकारी कार्यालयहरु निरीह देखिएको बताए । ठेकेदारले काम गरिरहेको बिषयमा लगातार अनुगमन गर्नुपर्नेमा नगरिरहेको उनको भनाई छ ।
शहरी विकास, पूर्वाधार, हुलाकीसहित सबै आयोजनाले आफ्नो जिम्मेबारी अनुसारको काम गर्नुपर्ने उनले बताए ।
ठेकेदारलाई इमान्दारी, जवाफ्देहितापुर्न तरिकाले काम गर्नुपर्नेमा जोड् दिदैं उनले यसो नगरिए अब कार्वाहीकै प्रकृया अघि बढाइने बताए ।
