राजविराज । हुलाकी राजमार्ग अन्तर्गत सप्तरीको राजगढ गाउँपालिकामा मिनी ट्रक दुर्घटना हुँदा त्यसमा सबार ५ जना घाइते भएका छन् ।
राजगढ गाउँपालिका ५ मलेकपुरस्थित सडक खण्डमा राजविराजबाट पत्थरगाडातर्फ जाँदै गरेको मधेश प्रदेश ०१–००१ क ०२५६ नं.को मिनी ट्रक डाक्नेश्वरी नगरपालिका ७ बस्ने केदार प्रसाद साहका १० बर्षीय छोरा नागेन्द्र प्रसाद साहलाई बचाउने क्रममा अनियन्त्रित भई दुर्घटना भएको प्रहरीले जनाएको छ ।
दुर्घटनामा १० बर्षीय बालक नागेन्द्र प्रसाद साहसहित सोही ठाउँमा ठेलामा चटपटे बेच्दै आएकी राजगढ गाउँपालिका ५ मलेकपुर बस्ने ३६ बर्षीय छोटे लाल दास, उनकी ३२ बर्षीया पत्नी सरस्वती देवी दास घाइते भएका छन् । घाइते यी तीनै जनाको राजविराजमा उपचार भइरहेको प्रहरीले जनाएको छ ।
सो दुर्घटनामा मिनी ट्रक साहु राजबिराज ७ बस्ने ४२ बर्षीय बैजु कुमारी साह र सह चालक छिन्नमस्ता गाउँपलिका ६ बस्ने ५५ बर्षीय बसन्त कुमार साह घाइते भएका छन् । यी दुई जनाको राजविराजमा सामान्य उपचार गराई थप उपचारका लागि बि.पि. कोइराला स्वास्थ्य विज्ञान प्रतिष्ठान धरानतर्फ पठाइएको प्रहरीले जनाएको छ ।
मिनी ट्रक चालक राजविराज वडा नम्बर १२ देउरी भरुवा बस्ने राजगुलाम यादव फरार भएको र उनको खोजी भइरहेको जिल्ला प्रहरी कार्यालय, राजविराजले जनाएको छ ।
