राजविराज । सप्तरीमा घोडामा राखेर लागूऔषध गाँजा तस्करी भइरहेको पाइएको छ ।
विशेष सुराकीको आधारमा इलाका प्रहरी कार्यालय हनुमाननगरबाट खटिएको ४ जना प्रहरी टोलीले शनिबार राति ९ बजेतिर हनुमाननगर कंकालिनी नगरपालिका १३ गोवरगाडा छतौनी क्षेत्रबाट घोडामा भारततर्फ लाँदै गरेको अवस्थामा १८४ किलो गाँजा बरामद गरेको छ ।
प्रहरी टोलीलाई देखेपछि घोडा, गाँजा छोडी मानिस तत्काल फरार भएका थिए । घोडासहित गाँजा बरामद भएपछि ल्याउन खोज्दा केहि अज्ञात व्यक्ति उक्त ठाँउमा आई गाँजा खोस्न खोज्दा भिडलाई नियन्त्रणमा लिन र बच्नका लागी प्रहरी टोलीले ठूलो चाईनिज पेस्तोलबाट १ राउण्ड हवाई फायर गरेको सप्तरी प्रहरीका प्रबक्ता एवं डीएसपी नरेश कुमार सिंहले जानकारी दिए ।
प्रहरीले गोल चलाएपछि अज्ञात समूह त्यहाँबाट भागेको र त्यसपछि घोडा र गाँजा लिई प्रहरी टोली कार्यालय तर्फ फर्केको सिंहले बताए । उक्त ठाउँमा जिल्ला प्रहरी कार्यालयबाट डीएसपी नेतृत्वको टोली खटिएर गाँजा तस्करहरुको खोजतलास तथा अन्य अनुसन्धान कार्य भईरहेको प्रहरीले जनाएको छ ।
