राजविराज । सबारी चालक अनुमति पत्र (लाइसेन्स) बनाउनका निम्ति सप्तरीबासीलाई अन्यत्र धाउनुपर्ने स्थितिको अन्त्य हुने भएको छ । अब सप्तरीबासीले आफ्नै जिल्लाबाट लाइसेन्स बनाउन पाइने भएका छन् ।
यातायात व्यवस्था सेवा कार्यालय, राजविराजले अब यहींबाट लाइसेन्स बनाउन लागिएको जनाएको छ । अब यहाँबाट लाइसेन्स लिनका लागि अनलाइन फारम भर्न सकिने कार्यालयले जानकारी दिएको छ ।
कार्यालयले लाइसेन्सका लागि राजविराज ९ मलेठमा ट्रायल सेन्टर बनाएको छ । ट्रायल सेन्टर संचालनको जिम्मेबारी छिन्नमस्ता ड्राइभिङ सेन्टरले पाएको छ ।
कार्यालय प्रमुख राजन झाका अनुसार यातायात विभागको अनलाइन सर्भरमा यो कार्यालय पनि जडान भइसकेकाले अब सेवाग्राहीले अनलाइन फर्म भर्न सकिने बताए । ‘यो कार्यालयको अनलाइन सर्भर जडान भइसकेकाले लाइसेन्सका लागि सेवाग्राहीले फर्म भर्न सक्छन्’ उनले भने ।
कुन–कुन सबारीको पाइन्छ लाइसेन्स ?
यातायात व्यवस्था कार्यालयले लाइसेन्स राजविराजबाटै दिने प्रावधान ल्याएपछि कुन–कुन सबारीको लाइसेन्स तत्काल उपलब्ध हुने भनेर हामीले कार्यालयका प्रमुख झासँग जिज्ञासा राख्यौं ।
उनका अनुसार तत्काल मोटरसाइकल, स्कुटर, कार, जीप, टयाक्टर र अटो रिक्साको लाइसेन्स यहाँबाट प्राप्त हुनेछ । ‘यी सबारीको लाइसेन्सका निम्ति विभागले अनलाइन सर्भर जडान गरिसकेको छ’ उनले भने, ‘अन्य सबारीको लाइसेन्स भने तत्काल यहाँबाट दिइने छैन् ।’
कति जनालाई दिइनेछ लाइसेन्स ?
पहिलो पटक लाइसेन्स उपलब्ध गराउन लागेको यो कार्यालयलाई तत्काल कोटा उपलब्ध गराइएको छ ।
कार्यालय प्रमुख झाका अनुसार यहाँबाट तत्काल १५० मोटरसाइकल÷स्कुटर, ४० वटा कारजीप, ३० वटा अटो रिक्सा चालक र १० वटा ट्याक्टरका चालकलाई लाइसेन्स दिइनेछ । ‘एक लटमा यति सेवाग्राहीलाई लाइसेन्स उपलब्ध हुन्छ’ उनले भने, ‘बाँकी सेवाग्राहीको चाप अनुसार तलमाथि हुन सक्छ ।’
‘शुरुमा कति जनाले अनलाइन फर्म भर्छन र उत्तिर्ण गर्छन् भन्ने कुरा हो’ उनले भने, ‘सेवाग्राहीको चाप बढ्न थालेपछि यो संख्यामा वृद्धि पनि हुन सक्छ ।’
