राजविराज । मधेश प्रदेशका शिक्षा मन्त्री महेश यादवले आगामी आर्थिक बर्षमा सप्तरीमा सिटिइभिटीको आंगिक क्याम्पस संचालनमा ल्याउने बताएका छन् ।
नेपाल कर्मचारी बचत तथा ऋण सहकारी संस्था, राजविराजको ११ औं साधारणसभालाई शनिबार उद्घाटन गर्दै मन्त्री यादवले उक्त जानकारी गराएका हुन् । उनले मधेश प्रदेशका ६ जिल्लामा सिटिइभिटीका आंगिक क्याम्पसहरु भएपनि सप्तरी र पर्सामा नभएको जानकारी गराए ।
सिटिइभिटीको आंगिक क्याम्पस संचालनमा आएपछि प्राविधिक शिक्षा लिन चाहने धेरै विद्यार्थीलाई सजिलो हुने बताउँदै उनले यसतर्फ आफूले गम्भीर भएर ध्यान दिएके बताए । ‘मैले यसबारे पत्राचार गरेको छु’ उनले भने, ‘आगामी आ.ब. २०८०÷८१ मै सिटिभिीको आंगिक क्याम्पस संचालन हुनेछ ।’
तत्काल भाडाको घरमा संचालन हुने र यसलाई स्थायित्व दिनका लागि ५ बिगाहा जग्गाको आवश्यक्ता पर्ने भन्दै उनले जिल्लाका पालिकालाई उपलब्ध गराउन आग्रह गरे ।
मन्त्री यादवले सामुदायिक विद्यालयप्रति अभिभावकको आकर्षण अहिले पनि नदेखिरहेको भन्दै अभिभावकलाई यसतर्फ आकर्षित बढाउनका लागि आफूहरुले काम गरिरहेको बताए ।
सहकारी संस्थाको मूल मन्त्र समाजलाई समृद्ध बनाउने रहेको भन्दै उनले सोही अनुसारको काम गर्नुपर्ने बताए ।
सहकारीको नाममा र मिटरव्याजीको नाममा भइरहेको आन्दोलनमा निर्दाेष व्यक्तिहरु पनि फँसिरहेको उल्लेख गर्दै उनले बिना कारण निर्दाेष नफसुन भन्नेतर्फ पनि राज्यले ध्यान दिनुपर्ने बताए ।
सहकारी सहकारी ऐन अनसार दर्ता भएको भएपनि पछिल्लो समयमा ऋण बुझाउँदा पनि जग्गा फुकुवा नहुने गरेको पाइएको भन्दै उनले यसतर्फ पनि राज्यले ध्यान दिनुपर्ने बताए ।
सहकारीका अध्यक्ष योगेन्द्र देवको अध्यक्षतामा भएको साधारणसभाको उद्घाटन सत्रमा बिभिन्न व्यक्तिहरुले शुभकामना मन्तव्य व्यक्त गरेका थिए ।
