राजविराज । सप्तरीमा साइकललाई ठक्कर दिएर भएको मोटरसाइकल दुर्घटनामा एक जनाको मृत्यु भएको छ भने दुई जना घाइते भएका छन् ।
बोदे बर्साइन–बिसनपुर सडक खण्ड अन्तर्गत खडक नगरपालिका ८ भदैयामा दक्षिणबाट उत्तरतर्फ आउँदै गरेको स १० प ३५२४ नम्बरको मोटरसाइकलले साईकललाई पछाडिबाट ठक्कर दिएको प्रहरीले जनाएको छ ।
ठक्करले साईकल यात्री खडक नगरपालिका ८ खेस्राहा बस्ने ५५ बर्षीय ईब्राहिम मियाँको मृत्यु भएको छ । गम्भीर घाइते भएका मियाँलाई यूनिक अस्पताल, रुपनीमा प्राथमिक उपचार गरी थप उपचारका लागि विराटनगरतर्फ लग्ने क्रममा बाटोमै मृत्यु भएको जिल्ला प्रहरी कार्यालय, राजविराजले जनाएको छ ।
मृतकको शवलाई राजविराजस्थित गजेन्द्रनारायण सिंह अस्पतालमा पोष्टमार्टमका लागि राखिएको सप्तरी प्रहरीका प्रबक्ता एवं डीएसपी नरेश कुमार सिंहले जानकारी दिए ।
उक्त दुर्घटनामा मोटरसाइकल चालक खडक नगरपालिका ७ कल्याणपुर बस्ने १९ बर्षीय अफ्रोज मियाँ र पछाडि सबार २० बर्षीय सनाबुल घाइते भएका छन् । उनीहरुको युनिक अस्पताल रुपनीमा उपचार भइरहेको छ ।
