राजविराज । जिल्ला प्रशासन कार्यालयले बोलाउने कार्यक्रममा नआउने सप्तरीका सरकारी कार्यालय प्रमुखलाई स्पष्टिकरण सोधिने भएको छ ।
बुधबार विश्व उपभोक्ता दिवस मनाइएको छ । राजविराजमा आयोजना गरिएको उक्त दिवसको आयोजक जिल्ला प्रशासन कार्यालय थियो भने घरेलु तथा साना उद्योग, करदाता सेवा तथा खाद्य प्रविधिी तथा गुण नियन्त्रण डिभिजन कार्यालयले सहयोग गरेको थियो ।
उक्त दिवसको अवसरमा जिल्ला प्रशासन कार्यालयबाट प्रभातफेरी निकाल्दै राजविराज नगरपालिकाको कार्यालयमा पुगेर कार्यक्रमको आयोजना गरिएको थियो । कार्यक्रममा ५ वटा जति सरकारी कार्यालयका प्रमुख र प्रतिनिधी मात्रै उपस्थित थिए ।
‘सबै सरकारी कार्यालयलाई कार्यक्रममा आउन पत्राचार गर्दा पनि आएनन्’ प्रमुख जिल्ला अधिकारी भूपेन्द्र थापाले भने, ‘माथिबाट भव्य तरिकाले मनाउने निर्देशन थियो ।’
उनले पत्राचार गर्दा पनि कार्यक्रममा नआउने सरकारी कार्यालयका प्रमुखलाई स्पष्टिकरण सोध्ने बताए । ‘किन आएनन् भनेर स्पष्टिकरण सोध्छु’ उनले भने, ‘सम्बन्धित बिभागलाई बोद्यार्थ राखेर यो पत्र थमाउँछु ।’
स्पष्टिकरण चित्त बुझ्दो नआए कार्वाही प्रकृया नै अघि बढाउने उनले बताए ।
कार्यक्रममा उनले सामान किन्दा म्याद हेरर किन्न आग्रह गर्दै उनले उपभोक्तासँग खेलबाड गर्नेलाई अब सिधै कार्वाही हुने बताए ।
