राजविराज । सप्तरी युथ नेपालले रामराजा सिंह स्वास्थ्य बिज्ञान प्रतिष्ठान अबिलम्ब निर्माण गर्न माग गर्दै प्रधानमन्त्रीलाई ज्ञापन पठाएको छ ।
युथ नेपाल अन्तर्गतको आन्दोलन परिचालन समितिका संयोजक सत्येन्द्र यादवको नेतृत्वमा गएको युवाको टोलीले प्रमुख जिल्ला अधिकारी किरण थापा मार्फत् आईतबार प्रधानमन्त्रीलाई ज्ञापन पठाएको हो ।
सप्तरीका युवा विकासको पक्षधर भएको र प्रतिष्ठान निर्माण अबिलम्ब शुरु गराउन एक हप्ते शान्तिपूर्ण आन्दोलन घोषणा गरेको उल्लेख गर्दै ज्ञापनमा प्रतिष्ठानको निर्माण कार्यलाई यथासिघ्र संचालनमा ल्याई नेपाली जनतालाई स्वास्थ्य सेवामा सहज पहुँचका लागि सहयोग गरिदिन हार्दिक अनुरोध गरिएको छ । ‘आशा छ, यहाँले मधेशका जनताको अपेक्षा र राज्यले नै गरेको घोषणा पूरा गर्न तदारुकता देखाउनुहुनेछ’ ज्ञापनमा भनिएको छ, ‘यो काम शुरु नभए हामी निरन्तर आन्दोलनमा लागिरहने जानकारी गराउँदछौं ।’
प्रतिष्ठान निर्माणका निम्ति बिभिन्न आर्थिक बर्ष रकम बिनियोजन भएतापनि काम हुन नसकी रकम फ्रिज भएको र हालसम्मको प्रगति हेर्दा डिपिआर समेत भई सकेको अवस्थामा निर्माण कार्यलाई तिव्रता दिनु आवश्यक रहेको ज्ञापनमा उल्लेख छ । मधेशकै बहुप्रतिष्ठित आयोजना लथालिंग अवस्थामा रहनु दुःखद भएको भन्दै प्रतिष्ठान संचालन आए पछि मधेश प्रदेश सहितका ११ जिल्लाका १ करोड ९ लाख जनतालाई प्रत्यक्ष रुपमा सेवा प्रदान गर्ने स्वास्थ्य मन्त्रालयकै लक्ष्य रहेको अवगत गराइएको छ ।
‘२०७५ सालमा नेपाल सरकारको मन्त्रीपरिषदबाट निर्णय भएको बिषय ५ बर्ष बित्दासमेत लथालिंग अवस्थामा पुग्नु बिडम्बना हो । सप्तरीमा रामराजा स्वास्थ्य विज्ञान प्रतिष्ठान निर्माण हुने सूचना पाएर हामी औधी खुशी भएका थियौं । तर, अहिले चिन्तित भएका छौं’ ज्ञापनमा भनिएको छ ।
