राजविराज । सत्तारुढ नेकपा एकीकृत समाजवादीका अध्यक्ष माधव कुमार नेपालले कान्तिपुर मिडिया ग्रुपका अध्यक्ष कैलाश सिरोहियाको गिरफ्तारीको भर्त्सना गरेका छन् ।
‘यो गिरफ्तारी निन्दनीय हो’ बुधबार राजविराजमा पत्रकारहरुसँग कुरा गर्दै उनले भने, ‘आफ्नो पार्टी यसको भर्त्सना गर्दछ ।’
सिरोहियाको गिरफ्तारीबारे सुनेर आफू अचम्भित र दुःखित भएको उनले बताए ।
सिरोहिया जनकपुरको बासिन्दा भएको सबैलाई थाहा भएको बताउँदै उनले उनको पुर्खा पनि त्यहीं बस्दै आएको बताए । एउटै नम्बरको दुई नागरिकता भए पाउनेभन्दा पनि दिने प्रशासन यसको दोषी हुने उनले बताए ।
गम्भीर अपराध गर्नेलाई समात्नु बेग्लै कुरा भएको भन्दै उनले गम्भीर अपराध नगरेको मान्छेलाई सोधपुछ गर्न सकिने बताए । ‘सोधपुछ गरेर सत्यतथ्य पत्ता लगाउन सकिन्छ । उहाँ सहयोग गर्न तयार नै हुनुहुन्थ्यो । तर यो गिरफ्तारी विचित्रको भयो’ उनले भने ।
