राजविराज । अब बर्षाको समय आउनै लाग्यो । केहि दिनभित्रै मनसुन भित्रिएपछि लगातार बर्षा हुन्छ । र, बर्षाका कारण बाढीले बितण्डा मच्चाउँछ । बाढीका कारण प्रत्येक बर्ष सप्तरीको दक्षिणी भेगका मानिस पीडित हुन्छन् । जनधनको क्षति व्यहोनुपर्ने हुन्छ ।
यस पटक बाढी आउनै लाग्दा सशस्त्र प्रहरीले यसबारे जनचेतनामूलक कार्यक्रमको आयोजना गरेको छ । सशस्त्र प्रहरी बल नेपाल नम्बर ६ गण हेडक्वाटरद्धारा बाढी प्रभावित जिल्लाको दुई पालिकामा जनचेतनामूलक कार्यक्रमको आयोजना गरिएको छ ।
तिलाठी कोइलाडी गाउँपालिका र हनुमाननगर कंकालिनी नगरपालिकाका विद्यालयदेखि समुदायस्तरमा पनि जनचेतनामूलक कार्यक्रमको आयोजना गरिएको सशस्त्र प्रहरी उपरीक्षक धनबहादुर सिंहले जानकारी दिए ।
सशस्त्र प्रहरी निरीक्षक हरिकृष्ण गिरीको नेतृत्वमा गएको टोलीले तिलाठी कोइलाडी गाउँपालिकास्थित पब्लिक माध्यमिक विद्यालय, हनुमाननगर कंकालिनी नगरपालिकाको महाबीर मावि हनुमाननगर तथा राष्ट्रिय मावि मल्हनियाँको कक्षा ९ र १० मा अध्ययन गर्ने बालबालिकालाई बाढी पहिरो रोकथाम तथा क्षति न्युनिकरणमा समुदायको भूमिकाको बारेमा तथा विपद्को तयारी, विपद भइरहेको बेलामा गर्नुपर्ने काम र विपद् पछि गर्नुपर्ने कामको बिषयमा जानकारी गराएका छन् ।
यसबाहेक बाढी आएपछि कसरी जोगिने भनेर स्थानीय पोखरीमा अभ्यास समेत गरेर देखाइएको प्रहरी निरीक्षक गिरीले जानकारी दिए । स्थानीय साधनश्रोतको प्रयोग गरेर बाढीबाट जोगिन सक्ने विधीबारे कृत्रिम अभ्यास गरेर देखाइएको उनले बताए ।
बर्षाको समयमा हनुमाननगर कंकालिनी नगरपालिका र तिलाठी गाउँपालिका बाढीको उच्च जोखिममा रहने गर्दछ । यसैलाई मध्यनजर गर्दै जनचेतनामूलक कार्यक्रमको आयोजना गरिएको सशस्त्र प्रहरीले जनाएको छ ।
