राजविराज । सप्तरी जिल्लामा चार वटा प्रतिनिधी सभा र आठ वटा प्रदेश सभा निर्वाचन क्षेत्र छ । यसमध्ये प्रदेश सरकारका लागि फापेको निर्वाचन क्षेत्र हो २ को १ ।
यो क्षेत्रबाट निर्वाचित सांसद मुख्यमन्त्री बनेका छन् । यो क्षेत्रबाट निर्वाचित सतिश सिंहले शुक्रबार मुख्यमन्त्रीको शपथ ग्रहण गरेका छन् ।
युवा नेता सिंह २०७४ सालको स्थानीय चुनावमा तिलाठी कोइलाडी गाउँपालिकाको अध्यक्षमा निर्वाचित भए । तत्कालिन राजपाबाट चुनाव लडेका उनी २०७९ को चुनावमा लोसपाबाट गाउँपालिका अध्यक्षमा चुनाव लड्दा पराजित भए । तीनै सिंह २०७९ को मंसिरमा भएको प्रदेश सभाको चुनावमा निर्वाचन क्षेत्र नम्बर २ को १ बाट लडे । र, विजयी भए । उनी जनमत पार्टीबाट चुनाव लड्दा विजयी भएका थिए ।
हुन त संघीयता स्थापनापछि २०७४ सालमा बनेको पहिलो प्रदेश सरकारको नेतृत्व सप्तरीले गर्ने देखिएको थियो । सिंह निर्वाचित भएको क्षेत्रबाटै त्यस बेला विजयी भएका थिए शैलेन्द्र प्रसाद साह । तत्कालिन संघीय समाजवादी फोरम पार्टीबाट निर्वाचित भएका साह मुख्यमन्त्रीका दाबेदार थिए । मुख्यमन्त्री नपाएपनि उनी यसअघिको मधेश सरकारमा लगातार ५ बर्ष मन्त्री रहे ।
शुरुमा भूमी, व्यवस्था कृषि तथा सहकारी मन्त्रीमा नियुक्त भएका साह पछि अर्थ मन्त्री बनेका थिए ।
साह २०७९ को चुनावमा भने शुक्रबार मुख्यमन्त्रीमा नियुक्त सिंहसँगै पराजित भए । यहीं क्षेत्रबाट निर्वाचित सांसद मुख्यमन्त्रीसम्म बन्दा सप्तरीका लागि क्षेत्र नम्बर २ को १ फापेको देखिन्छ ।
