राजविराज । सप्तरीको बोदे बसाइन नगरपालिकामा निर्माण गरिएको एक सडकमा दोहोरो भुक्तानी लिएर अनियमितता गरेको भन्दै नेपाली कांग्रेसले संघर्ष समिति गठन गरेको छ ।
नगरपालिकाको वडा नम्बर ९ स्वर्णपट्टीमा सडक निर्माणमा अनियमितता गरेको भन्दै कांग्रेसले संघर्ष समिति बनाएको हो ।
समितिमा दिनेश कुमार यादव, प्रदीप कुमार साह, बासुदेव राम, ममता कुमारी साह, मन्सी प्रसाद साह, बिनोद कुमार साह, सिबेन मण्डल, रामसागर साह, देबकुमार यादव, सूर्यनारायण साह, कुलदेव प्रसाद साह र दीपेन्द्र कुमार यादवलाई राखिएको छ ।
बुधबार बसेको एक भेलाले यो समिति बनाएको हो ।
कांग्रेस नेताहरुका अनुसार पालिकाले देउरी स्वर्ण नदी हुँदै सिम्राहा डिहबार थानसम्म सडक स्तरन्नोति कार्यमा दोहोरो भुक्तानी लिएको छ । आ.ब. २०७७÷०७८ मा प्रदेश सरकारको सहयोगमा बनेको १३०२ मिटर सडक देखाएर सडक बोर्डबाट पनि भुक्तानी लिएको पाइएको कांग्रेसका नेताहरुको भनाई छ ।
यो बिषयमा महालेखा परीक्षकको प्रतिवेदनले पनि बोलेकाले यसको छानबिन गराउन र दोहोरो भुक्तानी लिएकालाई कार्वाहीको दायरामा ल्याउन संघर्ष समिति बनाइएको कांग्रेसीले बताएका छन् ।
