राजविराज । मधेश प्रदेश सरकारले आगामी आर्थिक बर्ष २०८१÷८२ का लागि रु ४३ अर्ब ८९ करोड २१ लाख ७० हजार बजेट विनियोजन गरेको छ ।
अर्थमन्त्री भरत साहले शनिबार प्रदेश सभामा बजेट प्रस्तुत गरेका हुन् । विनियोजनमध्ये चालूतर्फ रु १६ अर्ब ७ लाख १ हजार अर्थात् ३६ दशमलव ४५ प्रतिशत र पूँजीगततर्फ रु २७ अर्ब ८९ करोड १४ लाख ६९ हजार अर्थात् ६३ दशमलव ५५ प्रतिशत छुट्टयाइएको छ ।
कुन मन्त्रालयलाई कति बजेट ?
बजेट बक्तव्यमा सबैभन्दा बढी भौतिक पूर्वाधार मन्त्रालयलाई बजेट उपलब्ध गराइएको छ । सबैभन्दा कम गृह, संचार तथा कानुन मन्त्रालयका लागि बजेट राखिएको छ । भौतिक पूर्वाधार मन्त्रालयतर्फ रु १३ अर्ब ११ करोड ५२ लाख ७४ हजार बजेट छुट्टयाएको छ ।
उर्जा सिंचाई तथा खानेपानी मन्त्रालयतर्फ रु ५ अर्ब १७ करोड ९६ लाख ४२ हजार, स्वास्थ्य तथा जनसंख्या मन्त्रालयतर्फ रु ५ अर्ब २१ करोड ६५ लाख ६ हजार विनियोजन गरिएको छ ।
यस्तै, उद्योग बाणिज्य तथा पर्यटन मन्त्रालयतर्फ रु २ अर्ब ९८ करोड ५८ लाख २२ हजार, शिक्षा तथा संस्कृति मन्त्रालयतफए रु २ अर्ब ९० करोड ५१ लाख ७६ हजार, भूमी व्यवस्था कृषि तथा सहकारी मन्त्रालयतर्फ रु २ अर्ब ७९ करोड १९ लाख, वन तथा वातावरण मन्त्रालयतर्फ रु २ अर्ब ४२ करोड ४० लाख २५ हजार, खेलकुद तथा समाज कल्याण मन्त्रालयतर्फ रु १ अर्ब ९५ करोड ८३ लाख ५० हजार, श्रम तथा यातायात मन्त्रालयतर्फ रु ९९ करोड ९७ लाख ४८ हजार तथा गृह, संचार तथा कानुन मन्त्रालयतर्फ रु ७७ करोड ५७ लाख ४ हजार बजेट विनियोजन गरिएको छ ।
