महेन्द्र सदा ।
पातो ।
सप्तरीको डाक्नेश्वरी नगरपालिका वडा नम्बर ५ पातो बजारस्थित दुई पसलबाट एकै समयमा चोरी भएको छ ।
शनिबार राति आएका चोरहरुले माँ डाक्नेश्वरी भगवती मोटरसाइकल वर्कशप र चौधरी कोल्ड एण्ड होटेलमा चोरी भएको हो ।
होटेल संचालक मनोज चौधरीका अनुसार चोरहरुले होटेलको मूल गेटको ताला तोडी भित्र रहेको मासु र रक्सी सिध्याएर चोरी गरेका रहेछन् । उनले होटेलबाट रु १ लाख बराबरको महँगो रक्सी चोरहरुले लगेका छन् ।
चोरहरुले वर्कशपबाट रु ५ लाख बराबरको मोटरसाइकलका पार्टपूर्जा चोरी गरेका छन् । वर्कशप संचालक संजीबकुमार मण्डलले वर्कशपभित्र राखिएका मोटरसाइकलमा अधिकांस पार्टपूर्जा चोरी भएको बताए ।
उक्त वर्कशपमा स्थानीय सन्तोष कुमार चौधरीले मर्मत गर्न दिएको प्रदेश २–०१–००२ प ९९६६ नम्बरको स्कुटर समेत चोरी गरेका थिए । चोरिएको ती स्कुटर डाक्नेश्वरी नगरपालिका ३ तरहीस्थित खेतमा भेटाइएको संचालक मण्डलले बताए ।
चोरीमा संलग्न भएकाहरुको खोजी भइरहेको इलाका प्रहरी कार्यालय पातोले जनाएको छ ।
