राजविराज । वैदेशिक रोजगारीमा पठाइदिने नाममा ४० जना युवकको रकम ठगी गर्ने एक व्यक्ति पक्राउ परेका छन् ।
पक्राउ पर्नेमा सप्तरीको खडक नगरपालिका वडा नम्बर ९ बस्ने २६ बर्षीय जयराम चौधरी छन् । लामो समयदेखि फरार रहेका उनलाई सामी परियोजनाको पहलमा प्रहरीले राजविराजबाट पक्राउ गरेको छ ।
सप्तरी, सिरहा र महोत्तरीका ४० जना युवकको रकम ठगी गरी चौधरी लामो समयदेखि फरार रहेका थिए ।
चौधरीलाई युवाहरुले बैंक खाता, इसेवा मार्फत् रकम दिएको पाइएको सामी परियोजनाका परामर्शकर्ता नीता चौधरीले जानकारी दिइन् ।
चौधरी पक्राउपछि ठगिएका सप्तरीको बलान बिहुल गाउँपालिका ५ का अशोक यादव पनि जिल्ला प्रशासन कार्यालय पुगे । यादवले दुबई पठाइदिने नाममा आफूसँग रु १ लाख लिएको बताए ।
सिरहाको नवराजपुरका रामएकबाल ठाकुरसँग चौधरीले रु २ लाख १५ हजार लिएका छन् । ‘एक साताभित्रै दुबई पठाइदिने नाममा करिब दुई महिनाअघि यत्रो पैसा लिएर चौधरी सम्पर्कबिहीन भएका थिए’ ठाकुरले भने ।
बलानबिहुलकै संजीत यादव र शिबराम यादवको रु २ लाखका दरले तथा सुरुङा नगरपालिकाका विद्यानन्द चौधरीको रु २ लाख ५० हजार लिएर विदेश नपठाइदिएको पीडितहरुले बताएका छन् ।
प्रहरी नियन्त्रणमा रहेका चौधरीबिरुद्ध अन्य अनुसन्धान भइरहेको परामर्शकर्ता नीताले बताइन् ।
