भारदह । सप्तरीको हनुमाननगर कंकालिनी नगरपालिकामा विंगरको ठक्करले घाइते भएका १५ महिने बालकको मृत्यु भएको छ ।
पूर्व पश्चिम राजमार्ग अन्तर्गत नगरपालिकाको वडा नम्बर १ भारदहस्थित कंकालिनी मन्दिर अगाडि आईतबार बिहान राजविराजबाट विराटनगरतर्फ जाँदै गरेको प्रदेश १–००२–००१ज ३८६६ नम्बरको विंगरले पैदल यात्री भारदह बस्ने ४५ बर्षीया अनितादेवी अधिकारीलाई ठक्कर दिएको थियोे ।
ठक्करले अनितासहित उनको काखमा रहेका १५ महिने नाति आदर्श अधिकारी समेत गम्भीर घाइते भएका थिए ।
उनीहरुलाई भारदह अस्पतालमा प्राथमिक उपचार गराई थप उपचारका लागि विराटनगर पठाइएको थियोे । जहाँ ती बालककाे मृत्यु भएको प्रहरीले जनाएको छ ।
यसैबीच ठक्कर दिएपछि स्थानीयले अबरुद्ध गरेको पूर्व पश्चिम राजमार्ग दिउँसो १ बजेदेखि खुलेको छ । उचित क्षतिपूर्ति दिने, मन्दिर अगाडि प्रहरी बिट स्थापना गर्ने, सडकको दुबैतर्फ फराकिलो बनाउने, मन्दिर अगाडि सबारीको गति कम गराउने सहमतिपछि जाम खोलिएको हो ।
