काठमाडौं । विधान विपरीत मनाेमानी गरेकाे भन्दै नेपाल पत्रकार महासंघका जिल्ला अध्यक्षहरूले केन्द्रीय समितिकाे ध्यानाकर्षण गराएका छन् ।
जिल्लाभरिका ५३ जिल्ला अध्यक्षले बुधबार केन्द्रीय समितिलाई ज्ञापन बुझाउँदै विधान अनुसार अघि बढ्न ध्यानाकर्षण गराएका हुन् ।
राजिनामा दिइसकेको र राजीनामा पनि स्वीकृत भइसकेका अध्यक्ष विपुल पोखरेलको हस्ताक्षरसहितको नामावली प्रकाशन गर्नु विधान विपरीत भएको जनाउँदै ज्ञापनमा भनिएको छ, ‘नेपाल पत्रकार महासंघको विधान अनुसार सदस्यता वितरण र नवीकरण शाखाको सिफारिस अनुसार प्रदेशले अनुमोदन गरी केन्द्रले अभिलेखीकरण गर्नुपर्ने व्यवस्था विपरीत र निर्वाचनका लागि गठन भएको निर्वाचन समितिले नामावली प्रकाशन, नामावली उपर दाबी उजुरी समेत लिइसकेको अवस्थामा निर्वाचन निर्देशिका र कार्यविधि विपरीत मात्र नभई निर्वाचनको सामान्य सिद्धान्त, मूल्य मान्यता र विधि पद्धति विपरीत छ ।’
सदस्यता नामावलीमा थप भएका सदस्यहरूको नामावली हेर्दा महासंघ केन्द्र आफैले जारी गरेको सदस्यता शुद्धीकरण मापदण्डको विपरीत रहेको उनीहरुले उल्लेख गरेका छन् ।
विधान विपरीत अघि नबढ्न आग्रह गर्दै जिल्ला अध्यक्षहरुले मनोमानी सदस्यता थपेर निर्वाचन गराउने प्रयास गरे न्यायका लागि कानुनी बाटो अबलम्बन गर्ने बताएका छन् ।
ज्ञापन बुझ्दै कार्यवाहक अध्यक्ष विष्टले मागलाई सकारात्मक लिएको बताउँदै केन्द्रीय समितिकाे बैठक राखेर छलफल गर्ने बताए । ‘जिल्लाले निर्वाचन नगराए केन्द्रले गएर निर्वाचन गराउँछ त ?’ उनले भने, ‘याे विषयमा हामी गम्भीर छाैं ।’
उनले महासंघलाई जिवन्त राख्न कसैलाई पनि आफ्नो अडानमा रहन नहुने भन्दै उनले अलिकति तलमाथि भए सबैले मानेर अघि बढ्नुपर्ने बताए ।
