राजविराज । जनता समाजवादी पार्टी (जसपा) नेपालका केन्द्रीय सदस्य विदेश्वर यादव ‘विक्की’ ले मधेशीसहित पिछडिएका वर्गले पाएको थोरै अधिकार हटाउन दुई ठूला दलले संविधान संशोधनको मुद्दा अगाडि बढाएको बताएका छन् ।
सप्तरीको शम्भुनाथ नगरपालिका १२ स्थित डेढबा पोखरीमा बिहीबार पार्टीद्धारा आयोजित कार्यक्रमलाई सम्बोधन गर्दै पूर्व प्रदेश सांसद समेत रहेका उनले यस्तो कुरा बताएका हुन् ।
जनतामाथि गोली बर्साएर बनाएको संविधानलाई ठूला दलले उत्कृष्ट संविधान भनेपनि अहिले संशोधन गर्न लागेको उनको भनाई छ । देशमा भएका हरेक आन्दोलनमा मधेशी, आदिवासी, जनजाती, मुश्लिम, दलितको सहभागिता भएपनि यी समुदायले पाएको थोरै अधिकारबाट बंचित गराउन कांग्रेस, एमालेले संविधान संशोधनको मुद्दा ल्याएको यादवले बताए ।
‘संविधानमा उल्लेख भएको समानुपातिक प्रणालीलाई हटाउन जुन प्रयास गरिएको छ’ यो सह्य हुँदैन’ उनले भने, ‘यसका निम्ति हामी सबैलाई एकजुट हुनु जरुरी छ ।’
कांग्रेस र एमालेकै नेताहरुले ठूला ठूला भ्रष्टाचार गरेर आरोप मधेशीमाथि लगाइरहेको उनको भनाई छ ।
‘ठूला ठूला भ्रष्टाचार काण्ड ललिता निवास, बाइडबडीजस्तामा कांग्रेस, एमालेकै नेताहरुको संलग्नता छ’ उनले भने, ‘तर आरोप मधेशीमाथि लगाइरहेको छ ।’
देशमा संचालित रहेका सयौ उद्योगलाई बन्द गरेर जनतालाई बेरोजगार बनाउने काम पनि यी दुई पार्टीले नै गरेको उनले बताए ।
पार्टीले शुरु गरेको चार महिने अभियान वडादेखि टोल टोलसम्म पुग्ने बताउँदै उनले अधिकारका लागि सबै एकजुट हुनुपर्ने बताए ।
पार्टी क्षेत्र नम्बर ३ का क्षेत्रीय अध्यक्ष कमलदेव यादवको अध्यक्षतामा आयोजित कार्यक्रममा गजेन्द्र प्रसाद चौधरी, कारी चौधरीको नेतृत्वमा एमाले परित्याग गरी ३५ जना, रामदेव पासवान, विहारी मण्डलको नेतृत्वमा काँग्रेस परित्याग गरी २८ जना र मधुर साहको नेतृत्वमा लोसपा परित्याग गरी २२ स्थानीय नेताकार्यकर्ता जसपा नेपालमा प्रवेश गरेका छन ।
