गंगा प्रसाद साह
भारदह । सप्तरीको हनुमाननगर कंकालिनी नगरपालिकास्थित कोशी नदीमा खसेको बसका चालकलाई प्रहरीले नियन्त्रणमा लिएको छ ।
पूर्वबाट पश्चिमतर्फ आउँदै गरेको बस नगरपालिकाको वडा नम्बर १ कोशी व्यारेजको ३६ नम्बर ढोकाबाट बिहीबार साँझ ६ बजेर ५ मिनेटतिर नदीमा खसेको छ । को.१ख ४६०१ नर्सिङ डिलक्स नामक बस कोशी व्यारेजको दक्षिणतर्फको रेलिङ भत्काएर नदीमा खसेको सप्तरी प्रहरीका प्रबक्ता एवं डीएसपी ढुण्डीराज न्यौपानेले जानकारी दिए ।
बसमा सबार १७ जना यात्रुको प्रहरी र स्थानीय मिलेर उद्धार गरेका छन् । ढोकामा पानी कम रहेकाले बस खसे लगत्तै पुगेको स्थानीयले बसको सिसा फुटाएर सबैलाई बाहिर निकालेका छन् ।
न्यौपानेका अनुसार उद्धार गरिएकाहरुको बिभिन्न अस्पतालमा उपचारका लागि पठाइएको छ ।
बसका चालक सिरहाको लहान नगरपालिका वडा नम्बर ८ बस्ने ३५ बर्षीय चन्दन कुमार मेहतालाई नियन्त्रणमा लिएको डीएसपी न्यौपानेले बताए ।
