राजविराज । कोशी व्यारेजको पुलबाट पैदल हिंडन समेत रोक लगाइएको छ ।
तीन दिनदेखिको निरन्तरको अबिरल बर्षाका कारण कोशीमा पानीको सतह अत्यधिक भई खतराको संकेत समेत पार गरेकाले सर्वसाधारणको सुरक्षाका लागि सुनसरी प्रशासनले पुलबाट मानिस तथा सबारीसाधनहरुको आवतजावत बन्द गराएको छ ।
जिल्ला प्रशासन कार्यालय, सुनसरीका सहायक प्रमुख जिल्ला अधिकारी वेदराज फुयाँलले शनिबार सूचना जारी गर्दै शनिबार दिउँसो ४ बजेदेखि अर्काे सूचना जारी नभएसम्मका लागि कोशी व्यारेजको पुलबाट मानिस तथा सबारीसाधनहरुको आवजावत बन्द गरिएको बताएइका छन् । ‘अति आवश्यक कामको लागि वैकल्पिक मार्गको प्रयोग गर्नुहुन समेत अनुरोध छ’ सूचनामा भनिएको छ ।
कोशी नदीमा पानीको बहाब निरन्तर बढ्दै गएको छ । दिउँसो ३ बजेको मापन अनुसार ५ लाख ४१ हजार १६५ क्यूसेक बहाब भइरहेको छ । बहाब बढ्दै जाँदा शनिबार बिहानैदेखि कोशीका सबै ५६ वटा ढोका खोलिएको छ ।
