राजविराज । लगातारको बर्षाका कारण बढ्दै गएको सप्तकोशी नदीको बहाब आज बिहानदेखि घट्न थालेको छ ।
हिजो शनिबार दिन र रातिभर लगातार बढ्दै गएको बहाब आज बिहानदेखि घट्न थालेको हो ।
आज बिहान ५ बजेसम्म पानीको बहाब ६ लाख ६१ हजार २९५ क्यूसेक पुगेको थियो ।
तर बिहान ७ बजेदेखि घट्न थालेको छ । बिहान ७ बजेको मापन अनुसार ६ लाख ५५ हजार ३७० क्यूसेक बहाब देखाइएको छ ।
यस्तै, बिहान ९ बजेको मापन अनुसार ६ लाख २८ हजार १४५ क्यूसेक बहाब देखिएको छ ।
बिहान १० बजेको बहाब ६ लाख १२ हजार ६७५ थियो भने ११ बजेको बहाब ५ लाख ८२ हजार ८६५ क्यूसेक थियो ।
मध्यान्ह १२ बजे गरिएको मापन अनुसार कोशीको बहाब ५ लाख ९ हजार ८७० क्यूसेक देखिएको छ ।
पानीको बहाब बढ्दै जाँदा कोशी व्यारेजको पुलमाथि बाढी बग्न थालेको थियो ।
यसपटकको कोशी नदीको बहाब ५६ बर्षपछिको उच्च हो । यसअघि सन् १९६८ अक्टोबर ५ तारिखमा कोशीमा पानीको बहाव प्रतिसेकेन्ड सात लाख ८८ हजार दुई सय क्यूसेक मापन गरिएको थियो ।
