राजविराज । असोज ११ र १२ गतेकोे अविरल बर्षाका कारण आएको बाढी, पहिरो तथा डुबानमा परी निधन भएकाको परिवारलाई मधेश प्रदेश सरकारले रु एक लाखका दरले राहत स्वरुप उपलब्ध गराउने भएको छ ।
मुख्यमन्त्री सतिशकुमार सिँहले विपद्मा ज्यान गुमाउने मृतकप्रति हार्दिक श्रद्धाञ्जली एवम् शोकसन्तप्त परिवारप्रति गहिरो समवेदना प्रकट गर्दै उक्त जानकारी गराएका हुन् ।
मुख्यमन्त्री सिँहले निरन्तर तथा तीव्र बर्खाका कारण बाढी, पहिरो तथा डुबानजन्य विपद्बाट प्रभावित प्रदेशवासीलाई राहत पुर्याउन एकद्वार प्रणाली अवलम्बन गर्न प्रदेशका आठवटै जिल्लाका प्रमुख जिल्ला अधिकारीहरूलाई निर्देशन समेत दिएका छन् । उनले बर्षा तथा बाढीबाट प्रभावित बस्तीमा राहत तथा पुनर्स्थापना कार्यलाई व्यवस्थित र प्रभावकारी बनाउन स्थानीय तहहरूलाई आग्रह गरेका छन् ।
मुख्यमन्त्री सिँहले विपद्का बेला मधेश प्रदेशमा खोज, उद्धार एवम् तत्काल राहत कार्यको व्यवस्थापनमा सक्रिय स्थानीय तह, सुरक्षा अधिकारी, सुरक्षाकर्मी तथा अन्य क्षेत्रलाई धन्यवादसमेत दिएका छन् ।
मुख्यमन्त्री सिँहले यसअघि नै बर्खाबाढीबाट प्रभावित गाउँबस्तीमा पुनर्स्थापनाका काम गर्न स्थानीय तह र विभिन्न स्थानीय तहलाई कार्यक्षेत्र बनाई काम गर्दैआएका अन्तर्राष्ट्रिय तथा राष्ट्रिय गैरसरकारी संस्थालाई आह्वान गरेका थिए ।
बर्षा र बाढीका कारण कृषि, सिँचाइ, भौतिक पूर्वाधारलगायत क्षेत्रमा भएका क्षतिका विषयमा विवरण संकलन भइरहेको जानकारी दिँदै मुख्यमन्त्री सिँहले त्यसअनुरूप राहत तथा पुनर्स्थापना कार्यमा सहजीकरण गर्न प्रदेशका मन्त्रालयहरू तथा मातहतका निकायलाई निर्देशन दिएका छन् ।
