राजविराज । राजविराज–कुनौली सडक खण्ड अन्तर्गत बिष्णुपुर गाउँपालिकामा बुधबार बिहान बस र ट्रक एकआपसमा ठोक्कियो । दुबैतर्फका झण्डै तीन दर्जन यात्रु घाइते भए ।
घाइते छटपटिरहेको दृश्य देखेका बटुवाले प्रहरीलाई खबर गर्छन् । तत्कालै सुरक्षाकर्मीको टोली घट्नास्थल पुग्छन् । बस र ट्रक दुबैबाट घाइतेको उद्धार गर्छन् । तत्कालै एम्बुलेन्स बोलाएर उपचारका लागि अस्पताल पु¥याउँछन् सुरक्षाकर्मीले ।
नेपाल तथा सशस्त्र प्रहरी र नेपाली सेनाको संयुक्त टोलीले संयुक्त रुपमा दुर्घटनामा घाइते भएकाहरुको उद्धार गरेका हुन् ।
घाइतेहरुको उद्धार भइरहँदा केहि व्यक्ति यात्रुको सामान लिएर गइरहँदा सुरक्षाकर्मीले उनीहरुलाई नियन्त्रणमा लिए । पक्राउ परेकाले आफूहरु उद्धार गरिरहेको बताएपनि थप अनुसन्धानका लागि नियन्त्रणमा लिएको प्रहरीले जनायो ।
उपरोक्त दुर्घटना वास्तविक झैं लागेपनि सुरक्षाकर्मीद्धारा दुर्घटना न्यूनिकरणका लागि गरिएको पूर्व तयारीको दृश्य हो यो ।
दुर्घटना भएपछि कसरी घाइतेको उद्धार गर्ने र ज्यान बचाउने सम्बन्धी पूर्व तयारीको प्रदर्शनी गरिएको छ ।
दुर्घटना हुँदा घाइते व्यक्तिको सामान पनि चोरी हुन सक्ने र सुरक्षाकर्मीले यसतर्फ पनि ध्यान दिनुपर्ने प्रदर्शनीमा देखाइयो ।
जिल्ला विपद् व्यवस्थापन समितिद्वारा सशस्त्र प्रहरीको संयोजनमा यो प्रदर्शनी गरिएको हो ।
विपद् व्यवस्थापन समितिका संयोजक समेत रहेका प्रमुख जिल्ला अधिकारी मेखबहादुर मंग्रातीले बर्तमान समयमा दुर्घटना बढिरहेकाले यसको सबै मिलेर न्यूनिकरण गर्नुपर्ने बताए ।
उनले सूचना पाएपछि सुरक्षाकर्मीले घाइतेको तत्कालै उद्धार गर्न गरिएको प्रदर्शनी वास्तविकका लागि फलदायी हुने विश्वास व्यक्त गरे । उनले व्यक्तिको ज्यान जान सक्ने ठाउँमा सुरक्षाकर्मी बचाबका निम्ति समयमै गइरहेको र भविष्यमा अझ चाँडो जाने विश्वास व्यक्त गरे ।
सशस्त्र प्रहरी उपरीक्षक ज्ञानमणी पौडेलले झण्डै दुई साता सुरक्षाकर्मीले यस सम्बन्धी प्रशिक्षण लिदैं बुधबार डेमो प्रस्तुत गरेको जानकारी दिए । उनले दुर्घटना न्यूनिकरणका लागि सबैले हातमा हात मिलाएर काम गर्नुपर्ने बताए ।
प्रदर्शनीमा जिल्ला समन्वय समितिका सभापति शिबनारायण साह, बिष्णुपुर गाउँपालिकाका अध्यक्ष उमेश प्रसाद यादव, जिल्ला प्रहरी कार्यालयका प्रहरी नायव उपरीक्षक ढुण्डीराज न्यौपाने, नेपाल पत्रकार महासंघ, सप्तरीका अध्यक्ष श्रवणकुमार देव, रेडक्रसका अध्यक्ष जोगेन्द्र भगतसहितको उपस्थिति रहेको थियो ।
