राजविराज । राजविराज नगर क्षेत्रमा जडान भएको सिसिटिभी क्यामेरा जडानमा अनियमितता भएको रहस्य बाहिरिएको छ । यो रहस्य स्वयं उपभोक्ता समितिले आफैं स्वीकार गर्दै त्यस वापतको रकम फिर्ता गरेका छन् ।
गत असारमा नगरपालिकाको मुख्य बजार क्षेत्रमा सिसिटिभी जडान गरिएको थियो । राजविराज सौन्दर्यीकरण नामक उपभोक्ता समितिले २१ जेठ २०८१ मा राजविराज नगरपालिका कार्यालयसँग सिसिटिभी क्यामेरा जडानका निम्ति सम्झौता गरेको थियो ।
रु ५६ लाख ३८ हजार ९१० कुल बजेटमध्ये रु ५ लाख ६३ हजार ९१० जनसहभागिताबाट व्यहोर्ने गरी उपभोक्ता समितिका अध्यक्ष तनबीर असफाकले नगरपालिकासँग सम्झौता गरेका थिए ।
तर, उक्त रकममा व्यापक अनियमितता गरेको भन्दै अख्तियार दुरुपयोग अनुसन्धान आयोग इटहरीको कार्यालयमा उजुरी परेको थियो । अख्तियारले यो प्रकरणमा अनुसन्धान अघि बढाउँदै सिसिटिभी जडान कार्यमा बिल बनाउने कार्यमा संलग्न प्राविधिक, भुक्तानी गर्ने प्रमुख प्रशासकीय अधिकृत, लेखा प्रमुख, अनुगमन कार्यमा संलग्न कावा मेयर इसरत परबिन, योजना प्रमुख मनोज कुमार यादव र इन्जिनियर अशोक कुमार दास, उपभोक्ता समितिका अध्यक्ष तनबीर असफाक, सचिव तबरेज आलम र कोषाध्यक्ष रुसा खातुनको डिटेल जानकारी मागेको थियो ।
अख्तियारको इटहरी कार्यालयले २७ माघमा ती व्यक्तिहरुको सम्पर्क नम्बर, ठेगाना, हालको पद र कार्यालयसहितको विवरण ७ दिनभित्र उपलब्ध गराउन नगरपालिकालाई पत्राचार गरेको थियो ।
अख्तियारले पत्राचार गरेपछि ४ फागुनमा उपभोक्ता समितिले राजविराज नगरपालिकाका राजस्व शाखामा रकम फिर्ता गरेका छन् । उपभोक्ता समितिका अध्यक्ष तनबीर असफाक, सचिब तबरेज आलम र कोषाध्यक्ष रुसा खातुनले रकम जम्मा गरिएको जानकारी नगरपालिकाका प्रमुख प्रशासकीय अधिकृत डा. श्रवण साहलाई पत्र मार्फत् दिएका छन् ।
उपभोक्ता समितिले नगरपालिकाको खातामा रु ५० लाख ५० हजार जम्मा गरेको छ । नगरपालिकाले दिएको भुक्तानी रु ४५ लाख ९१ हजार ४८६ को एक बर्षको हुन आउने १० प्रतिशत व्याजसहित उक्त रकम जम्मा गरेको पत्रमा उल्लेख गरेका छन् ।
राजविराज नगरपालिकाले सिसि क्यामेरा जडान गर्न टेन्डर नलगाई उपभोक्ता समितिबाट जडान गराएको थियो ।
