राजविराज । अस्पतालमा बेथिती उत्पन्न गर्ने, बदमासी गर्ने कर्मचारीलाई सम्बन्धित निकायले कार्वाही गरे राजनीतिक दल मौन बस्ने भएका छन् ।
गलत गर्नेलाई राज्यको निकायले कार्वाहीको दायरामा ल्याउन खोज्दा यसअघि पक्ष लिने र कार्वाही नगर्न दवाव दिने सप्तरीका राजनीतिक दलका नेताहरुले गलत गर्नेलाई साथ नदिने प्रतिबद्धता जनाएका हुन् ।
राजविराजस्थित गजेन्द्रनारायण सिंह अस्पतालमा देखिएको समस्याबारे शनिबार सर्वपक्षीय बैठक बस्यो । बैठकमा सहभागी राजनीतिक दलका नेताहरुले अस्पतालजस्तो ठाउँमा गलत काम गर्नेलाई प्रश्रय नदिने बताए । ‘यस्तालाई कार्वाही हुनुपर्छ’ उनीहरुले सामूहिक रुपमै भने ।
बैठकमा यतो निर्णय नै भएको छ । ‘अस्पतालमा बेथिति उत्पन्न गर्ने जोसुकै व्यक्ति वा कर्मचाीलाई सम्बन्धित निकायले कार्वाही गर्दा हामी सबै राजनीतिक दलहरु त्यस्ता व्यक्तिलाई सहयोग गर्दैनौं’ बैठकमा भनिएको छ ।
उक्त बैठकले गजेन्द्रनारायण सिंह अस्पतालमा दरबन्दी भई बाहिर काजमा खटिएका चिकित्सकलाई फिर्ता गरिदिन, मेडिकल सुपरिटेन्डेन्टलाई तत्काल कार्यालयमा नियमित गराउने र रिक्त पदमा तत्काल पदपूर्ती गर्न स्वास्थ्य तथा जनसंख्या मन्त्रीलाई अनुरोध गर्ने निर्णय गरेको छ ।
बैठकमा सहभागी भएकाहरुले केहि व्यक्तिका कारण अस्पताल लथालिङ बनिरहेको उल्लेख गर्दै पहिचान गरी त्यस्तालाई कार्वाहीको दायरामा ल्याउनुपर्ने बताए ।
बैठकमा सहभागी प्रमुख जिल्ला अधिकारी भोला दाहालले आफू एक पटक अस्पतालको निरीक्षण गर्दा धेरै कर्मचारी अनुपस्थित देखिएको बताए । अब उप्रान्त अनुपस्थित भए र आफ्नो ड्यूटी नगर्नेलाई कार्वाहीका लागि सिफारिस गर्ने बताए ।
‘म जुनसुकै बेला, जुनसुकै रुपमा पनि अस्पताल गएर अनुगमन र निरीक्षण गर्छु’ उनले भने, ‘आफ्नो ड्यूटि नगर्नेलाई कार्वाही गराउन कुनै कसर बाँकी राख्ने छैन् ।
जिल्ला समन्वय समितिका प्रमुख शिबनारायण साह र रुपनी गाउँपालिकाका अध्यक्ष दिनेश कुमार यादवले ७ फागुनमा अस्पतालको अनुगमन गर्दा अवस्था लथालिङ देखिएको बताए ।
समन्वय समितिका प्रमुुख साहले अस्पतालका मेसु सुरक्षाकै कारण देखाउँदै गएको भन्ने सूचना प्राप्त भएकाले यस बिषयमा सबैलाई गम्भीर बन्नुपर्ने बताए ।
नेपाली कांग्रेसका जिल्ला सचिव सनत कुमार मण्डलले अस्पतालभित्र धेरै बेथिति रहेको भन्दै यसको समाधानका लागि सबै एकजुट बन्नुपर्ने बताए ।
जनता समाजवादी पार्टी (जसपा) नेपालका जिल्ला अध्यक्ष केदार यादवले अस्पतालजस्तो ठाउँमा कसैले राजनीति गर्न नहुने बताए । उनले गलत काम गर्ने जोसुकैलाई कार्वाहीको दायरामा ल्याउन जोड् दिए ।
राजविराज नगरपालिकाका कावा प्रमुख इसरत परबिनले अस्पताललाई राम्रो बनाउन सबै एकमत हुनुपर्ने बताइन् ।
छिन्नमस्ता गाउँपालिकाका अध्यक्ष विद्यानन्द चौधरीले अस्पताल सुधारका निम्ति सबैले ध्यान दिनुपर्ने बताए ।
