राजविराजस्थित मधेश कृषि विश्वविद्यालय दिनप्रतिदिन कमजोर बन्दै गएको छ । स्थापना भएको तीन बर्षमा उचाइँमा जानुपर्ने विश्वविद्यालय तलतिर खस्किदैं गएको अवस्था छ । गत भदौदेखिको तलव नपाएको भन्दै प्राध्यापक तथा कर्मचारीले १ फागुनमा विश्वविद्यालयमा तालाबन्दी गरे । शनिबार बसेको सर्वपक्षीय बैठकले तलवका लागि पहल गर्ने निर्णय गर्दै खोल्न आग्रह गरेपछि प्राध्यापक र कर्मचारीले शनिबारै ताला खोलेका छन् । ताला खुलेपछि पठन पाठन पनि शुरु भएको छ । तर, यसले समस्याको समाधान भएको हो त ? पक्कै पनि भएको छैन् ।
कृषि विश्वविद्यालय जुनसुकै दलका नेताले स्थापना गरेपनि यो सार्वजनिक निकाय हो । अब यो संस्था समग्र जनताको हो । यसमा मैले यस्तो गरे, म यस्तो गर्छु भन्ने भावना यदी कसैले बोकेका छन् भने न्यायसंगत हुन सक्दैन् । तर बिडम्बना स्थिति यस्तै बनेको छ । जनमत नेतृत्वको मधेश सरकारलाई कृषि विश्वविद्यालय जोगाउन गम्भीर बन्नुपर्ने हो, तर सकृयता देखाउन सकेका छैनन् । दुई दल या दुई व्यक्तिबीचको विवादमा सार्वजनिक संस्थालाई यदी तानिन्छ भने यो कदापी स्वीकार्य हुन सक्दैन् ।
हरेक क्षेत्रमा कमजोर देखिएको सप्तरी जिल्लामा जन्म लिएको एउटा संस्थालाई मार्ने दुस्साहसलाई जनताले पक्कै पनि स्वीकार्य गर्ने छैनन् । कृषि विश्वविद्यालयलाई बिगारेर सप्तरी जिल्लालाई नै बदनाम गर्ने खेल गरिएको छ । जसले पनि यो खेल खेलिरहेका छन्, ती व्यक्ति या दल पछि गएर आफैं फन्दामा पर्नेमा दुईमत छैन् । किनभने अहिलेका जनता सचेत भइसकेका छन् । यसर्थ गम्भीर भएर कृषि विश्वविद्यालयको समस्या समाधान गर्न सम्पूर्ण राजनीतिक दल, मधेश सरकार, स्थानीय सरकारलाई गम्भीरता देखाउनु जरुरी छ ।
