राजविराज । कर छुट सुविधाको अन्तिम म्याद फागुन मसान्तसम्म रहेकाले यो सेवाको उपभोग गर्न कर कार्यालयले सबैसँग अनुरोध गरेको छ ।
राजविराजस्थित करदाता सेवा कार्यालयले यस्तो अनुरोध गरेको हो । कार्यालय प्रमुख लालदेव सर्राफले यस बिषयमा कार्यालयद्वारा सप्तरी जिल्ला भरी माइकिङ्ग कार्यक्रम, पर्चा पम्पलेट बितरण गर्ने कार्य जारी रहेको छ । उनले विवरण नबुझाएका सबै करदाताको मोबाइलमा विवरण बुझाउन म्यासेज पठाउने, फेसबुक पेजमा विवरण नबुझाएका करदाताहरुको पालिका अनुसार लिस्ट राखि विवरण बुझाउन अनुरोध गरेको र चिठी पत्राचार गर्नेजस्ता थप प्रयास गरेको जानकारी दिए ।
देशै भरी ठुलो संख्यामा करदाताहरुले कर विवरण नबुझाइ बस्ने गरेकाले सरकारले करको दायरामा आउने नयाँ करदातालाई तीन आर्थिक वर्ष अगाडिको सबै छुट, पान नम्बर लिएका तर विवरण नबुझाएकालाइ शुल्क जरिवाना र ७५ प्रतिशत ब्याज छुट र मूल्य अभिवृद्धि करमा दर्ता भइ विवरण नबुझाएकालाई जरिवाना छुटको व्यवस्था आर्थिक ऐन मार्फत ल्याएको छ । यसको अन्तिम म्याद यही फागुन २९ गते सम्म रहेको छ । चैत्र देखि सबै लाग्ने र छुट नपाउने भएर यस्तो सुवर्ण अवसरको प्रचारप्रसार गरी कर विवरण बुझाउन कर कार्यालयले अनुरोध गरेको छ ।
करदाता सेवा कार्यालयले हनुमाननगर कंकालिनी नगरपालिकाको हनुमाननगर बजारमा कर शिविर सम्पन्न गरेको छ ।
शिविरमा कर छुट सम्बन्धी जानकारी दिने, साना प्रोप्राइटरसिप करदाताले लिखित रुपमा घोषणा गरेको कारोबार विवरणलाई कम्प्युटरबाट प्रविष्ट गर्न सिकाउने देखि नयाँ दर्ताको प्रक्रियाबारे जानकारी दिइएको छ ।
सयौं करदाताको सहभागी रहेको शिबिरमा ८० भन्दा बढी विवरण दाखिला भइ ननफाइलर घटेको कर अधिकृत सर्राफले बताए ।
