राजविराज । धेरै दिनको प्रतिक्षापछि राजविराज बसपार्क संचालनमा आएको छ ।
वडा नम्बर २ राजदेवी चोकमा निर्माण भएको बसपार्क बिहीबारदेखि संचालनमा आएको हो ।
बसपार्कको एक कार्यक्रमकाबीच नगरका कावा प्रमुख इसरत परबिनले उद्घाटन गरिन् । बसपार्कमा पार्किङ गरिएको तीन वटा बसमा झुण्ड्याइएको रिबन काटेर उनले बसपार्कको उद्घाटन गरिन् ।
उद्घाटनसँगै पार्किङ गरिएका बसहरु आ–आफ्नो गन्तव्यतर्फ लागेको थियो ।
तीन पटक शिलान्यास भएको यो बसपार्क निर्माणको काम २०७४ सालबाट मूर्त रुप लिएको थियो । २०७४ साल पुस १९ गते निर्माण कम्पनीसँग ठेक्का सम्झौता भएर ६ पटक म्याद थपेर यो बसपार्कको निर्माण भएको हो ।
१६ करोड ३८ लाख ९६ हजारको लागतमा निर्माण भएको बसपार्क सुविधा सम्पन्न छ । यहाँ ९० वटा बस र २० वटासम्म ट्याक्सी पार्किङ गर्न सकिने सघन शहरी तथा विकास निर्माण आयोजनका प्रमुख सुरेन्द्र साहले जानकारी दिए ।
उनका अनुसार मोटरसाइकलसहित सय वटा साना सबारी समेत पार्किङ गर्न सकिनेछ ।
उद्घाटन कार्यक्रमका बक्ताहरुले अब जथाभावी तरिकाले बससहितका सबारीसाधन पार्किङ गर्न नहुने बताए । उनले बसपार्कमै पार्किङ गरेर यहींबाट बस संचालन गर्नुपर्नेमा जोड् दिए ।
उक्त अवसरमा जिल्ला समन्वय समितिका प्रमुख शिबनारायण साह, प्रमुख जिल्ला अधिकारी भोला दाहाल, नेपाल उद्योग बाणिज्य संघका सदस्य अरुण प्रधान, सप्तरी उद्योग बाणिज्य संघका अध्यक्ष लालुप्रसाद अग्रबाल, जसपा नेपालका अध्यक्ष केदार यादव, लोसपाका अध्यक्ष सुनिल झा, नेपाल पत्रकार महासंघ, सप्तरीका अध्यक्ष श्रवण कुमार देव, नागरिक समाजका अगुवा थानसिंह भन्साली, मैथिली साहित्य परिषद्का अध्यक्ष अवधेश झा, सगरमाथा ट्रक ढुवानी संघका अध्यक्ष जगदीश अर्यालसहितकाले मन्तव्य व्यक्त गरेका थिए ।
वडा नम्बर २ का अध्यक्ष अरुण यादवको अध्यक्षतामा भएको कार्यक्रममा नगरपालिकाका प्रबक्ता समेत रहेका वडा नम्बर ८ का अध्यक्ष जयनारायण मण्डलले स्वागत मन्तव्य व्यक्त गरेका थिए ।
